اعترافات ليلية

اسمي امجد احمد خشبة ليسانس حقوق من محافظة أسيوط – يعني صعيدي – حاليا بشتغل في محكمة أسيوط – يعني موظف – أنا شخص هادي لحد الملل قليل الكلام وقليل الفضفضة وعنيد جدا – في محطات كتير في حياتي كانت نقطة تحول إنما أهمها تجربة سفر خارج  مصر عرفت وقتها إن مصر أجمل بلد في الدنيا – واني استخدم عقلي قبل عواطفي مهما كان الأمر – دخلت عالم التدوين في 2007 عن طريق أخي إيهاب صاحب مدونة صوت أسيوط - كنت أمر بظروف صعبة ولأني قليل الفضفضة حاول معي أن اشغل وقتي بأي شئ فعرض عليا موضوع التدوين في البداية استرخمت الموضوع لكن حطني قدام الأمر الواقع عملي مدونة وقلي اتفضل اكتب وقتها عرفت انه عمل فيا جميل مش هانساه أبدا – اسم المدونة فكرة – من وجهة نظري أن أي شئ في الدنيا بدأ بفكرة سواء كان اختراع أو إبداع ففكرة الطيران جعلت الإنسان يخترع الطائرة وفكرة تسجيل الإحداث جعلت الإنسان يبحث عن القلم فإذا كانت الحاجة أم الاختراع فالفكرة سبب الإبداع – مدونتي أضع فيها أحاسيسي فانا لست بشاعر أو قصاص ولكن اشعر وأفكر فاكتب – هناك مدونات رائعة اتعلمت منها كتير جدا لكن أهم أتنين بحترم قلمهم جدا دكتور مصطفي سيف مدونة طير الرماد – ودكتورة شيرين سامي مدونة حدوتة مصرية وبعد أن اشتركت في حملة التدوين المرادي أعجبتني جدا كتابات منة صاحبة مدونة فراولة لأننا تقريبا  متشابهان كثيرا في الأفكار والأسلوب – أنا دودة قراية وكل من قرأت لهم كونوا جزء من تفكيري سواء من داخل أو خارج التدوين ومن خارج التدوين فاروق جويدة ونزار وفاروق شوشة ويوسف زيدان واحمد خالد توفيق ونبيل فاروق ومحمد متول الشعراوي ومصطفي محمود مش عايز انسي حد إنما أنا بقرا لكل الناس لان فاقد الشئ لا يعطيه فإذا لم تقرأ لن تكتب – وليس لي أي طقوس في الكتابة أنا بكتب في أي وقت وفي أي مكان حتى وأنا نايم كتير أقوم من نومي واكتب فكرة جت فجأة و لما تجيلي فكرة - لو فاضي بدندن فيها ولو في الشغل بكتبها كده ملخص أو مسودة لحد ما أفضي وليس لي أسلوب معين في الكتابة أنا بكتب اللي بحس بيه علي طول - اقرب تدويناتي إلي نفسي يوميات قلم لأنها كانت فكرة جديدة بالنسبة ليا إني أتحدث بالنيابة عن القلم وكانت أول مجموعة قصصية منفصلة متصلة [وده اللينك لأول تدوينه منها] – التدوين عرفني علي ناس جميلة جدا واخدت خبرات كتيرة جدا واستفدت جدا من كل تدوينه قريتها.

اعتقد إني طولت أوي فاعتذر لكم جميعا وفي النهاية هو مش سؤال هو شكر للدكتورة شيرين إنها خلتنا نرجع للمدونات المهجورة تاني