قرات هذا العنوان اثناء مروري الشبه يومي علي مواقع النت المختلفة وهو يتكلم عن الزواج التقليدي والزواج الذي كانت بدايته عاطفة وحب ورغم اعتراضي وعدم اقتناعي بهذا العنوان الا انه والي حد بعيد يتضمن بعضا من الصواب فالزواج التقليدي في حد ذاته عبارة عن مجموعة افكار محددة يحددها المقبل علي الزواج فمثلا يحدد المقبل علي الزواج ان تكون عروس المستقبل رفيعة ومحجبة ومدرسة بتدي دروس خصوصية او مثلا تكون حلوة وعندها صيدلية وهكذا اذن الامر لا يتدخل فيه القلب نهائيا ربما تتحول هذه الافكار بالعشرة والاقتناع بالشخصية الي حب وعشق ولكن البداية كانت مجموعة افكار ليس اكتر اما زواج القلب ولان الحب ياتي بدون استئذان ولكن ياتي فجاة وفي بداية عنفوانه وقوته يلغي العقل تماما ويصبح القلب هو المتحكم والامر الناهي ولكن عندما يبدا الامر يتحول الي زواج هنا يجب ان يتدخل العقل وبقوة في اشياء كثيرة وهي اشياء لا تقل اهمية عن الحب باي حال من الاحوال حيث يجب ان نسال انفسنا مجموعة من الاسئلة الهامة هل نحن مستعدون لتحمل مسؤلية الزواج هل نحن مهيئون لتقبل مميزات وعيوب الطرف الاخر هل السبب من التفكير في الزواج هو مجرد الزواج فقط هل السبب هو سبب جنسي بحت لتفريغ الكبت الجسدي هل نحن مستعدون ماديا للانفاق علي تكاليف الزواج والانفاق علي بيت الزوجية هل نحن مستعدون لاستقبال اطفال وتحمل مسؤلية التربية الصحيحة اسئلة هامة واجابتها اهم اذن الحب وحده وان كان يجعلنا نغفر ونعفو ونسامح ونعيش اجمل لحظات عمرنا الا انه وحده لا يكفي لتكوين اسرة سعيدة اذن فالعقل يلعب دورا هاما في استمرارالحياة الزوجية سواء كان الزواج تقليدي او زواج بحب وعشق بشرط الا يلغي العقل القلب نهائيا ولقد شاهدت زيجات كثيرة تمت عن طريق الاهل او الاصحاب وكتب لها النجاح والاستقرار وانا من وجهة نظري المتواضعة ان شرط استمرار العلاقة الزوجية بين الطرفين وكما ذكرت من قبل في بوستات عن العشق والهوي والاحساس ان الصدق والصراحة والمصارحة والاحساس بالطرف الاخر هي بدايات الزواج الصحيح الناجح لذلك فاعتقد ان طول فترة الخطبة هي وسيلة لبداية الزواج السليم بشرط ان يكون هناك حوار ودراسة لتصرفات كل طرف لا اقصد ان يضع كل طرف الطرف الاخر تحت الاختبار ولكن اعني ان المواقف والمناقشات يستبين منها طريقة تفكير كل طرف بل اكاد اجزم ان راي شخص في اغنية او فيلم او خبر في جريدة نستطيع ان نتبين منها طريقة تفكيره ومبادئة بشرط ان لا نتسرع في إصدار الاحكام على الشخصية إذ إن جوانب الشخصية ومميزاتها لا تظهر إلا من خلال التعامل وهناك مجموعة من النقاط الهامة التي نستطيع منها تحديد شريك الحياة منها مثلا
الالتزام الديني وهو يعتبر الاساس في تكوين اسرة مستقرة هادئة
التقارب في السن فكلما كان السن متقاربا كلما كان ذلك أفضل وان كانت هذه القاعدة لها استثناءات
التقارب في المستوى الاجتماعي والتعليمي حتي تكون الحوارات والمناقشات سهلة الفهم بين الطرفين بل ومن الممكن ان تكون وسيلة لمعرفة تفكير كل طرف للاخر
كذلك لا ننسى التوافق الروحي والشعور بالراحة والطمأنينة تجاه شريك الحياة وقد قال الرسول صلى الله عليه وسلم الأرواح جنود مجندة ما تعارف منها ائتلف وما تنافر منها اختلف
واخيرا ادعو الله بالتوفيق لكل المقبلين علي الزواج
ولا ننسي قول الحبيب محمد عليه الصلاة والسلام إذا جاءكم من ترضون دينه وخلقه فزوجوه
هناك 46 تعليقًا:
قلت اعدي عليك قبل لما انام واشوفك كتبت حاجة جديدة والا لأ والحمد لله لقيتك كتبت
موضوع مهم جدا وتقريبا كل اللي انت قلتة صح
في كتير قصص حب بتنتهي بالجواز وفجأة تحس ان مش هو دة حبيبك اللي كان خطيبك
الحياة الزوجية دي حاجة صعبة خالص
في الاول البنت بتبقى فرحانة ببيتها وحياتها الخاصة ومش بتبقى فاهمة المسئولية الكبيرة اللي بتكون عليها وبعدين بتلاقي الموضوع حاجة تانية خالص مش زي ماكانت فاهمة ان لقمة صغيورة تشبعنا وعش العصفورة يكفينا
انا اعتقد ان معظم حالات الطلاق بتكون الزوجة هي السبب فيها لانها بتكون ماقدرتش تفهم يعني اية تنازل وانها تيجي على نفسها في حاجات كتير علشان المركب تمشي بس لازم برضة الزوج يحسسها انة عارف ومقدر التنازلات دي مش يبقى هو في وادي وهي في وادي تاني
وللاسف البنات اليومين دول بقت اسهل حاجة عندهم الطلاق مابقاش عندهم قدرة على التحمل مش عارفة بقى دة دلع والا اية
على فكرة انا اخويا عندة 27 سنة ومطلق مراتة من سنة والحمد للة مفيش اولاد وطليقتة دي كانت زميلتة وحب اربع سنين في المعهد
معلش انا طولت عليك وبرضة ماقلتش كل اللي عاوزة اقولة
يا حلاوة انا اول تعليق
شاهي
دايما منوراني ورافعة من روحي المعنوية
ومش طولتي ولا حاجة انا بستمتع بتعليقاتك جدا
وكل كلامك منطقي للغاية فرحة وزهوة الزواج مش للست بس للراجل كمان بتنسيهم المسؤلية نسبة الطلاق في البلد بقت نسبة مخيفة ومع ارتفاع تكاليف الزواج والمهور هاتحصل كارثة ربنا يرحم
شكرا ياصاحبة اجمل واول تعليق
تحياتي
البوست مهم جدا فى بنات فاكرة ان الجواز مجرد فرح وفستان ابيض وخلاص وفى ولاد فاكرة ان الجواز مجرد واحدة فى حياتهم وخلاص لكن الجواز اكبر من كدة بكتييييييييير يعنى مرة سألت واحده ايه هدفك فى الحياة قالت انى اتجوز هو دة هدفها انها تتجوز وخلاص من غير لما تشوف انها تخلص دراستها الاول او انها تكون قادرة على تحمل المسؤليه تحياتى الشديدة لك
رضوي
شكرا لمرورك وفعلا كلنا فقدنا المفهوم الحقيقي للارتباط وفقدنا احساسنا ببعض
تحياتي وارجو استمرار التواصل
بشكل شخصى انا لا استطيع ان افكر فى الزواج من رجل لا احبه وفى نفس الوقت لا اسمى هذا الزواج زواج قلب فحسب لاننى لا يمكن ان افقد اتساقى مع نفسى واحب شخص لا يحمل من الصفات ما يأسر به عقلى اولا
وان كنت اعتقد ان طول فترة الخطوبة لا يكون حل فى معظم الاوقات لان المسئوليات فيها تكاد تكون منعدمة ولن يقدر اى طرف على اختبار الطرف الاخر بصدق
م الآخر كده الجواز ده زى البطيخة يا تطلع حمرا يا تطلع قرعة
مريم
هي وجهات نظر وقدرات وطبعا محدش عارف نصيبه فين ودي اقدار وبطيخ زي ما انتي قلتي المهم اننا نعمل اللي علينا ونسييب نصيبنا يعمل اللي هو عايزه
تحياتي
انا مقتنعه جدا ان جواز العقل انجح زواج
مع احترامى لوجهات النظر الاخرى :D
الحب فعلا بيجى بالعشرة
رينا
زي ما قلت لمريم ان دي وجهات نظر هاقولك انتي برضه دي وجهات نظر وده للاختلاف بين الظروف والشخصيات والطباع وانا مقتنع ان مفيش مقياس ثابت لاي حاجة علي لارض كل يوم في حاجة بتتغير تحياتي لمرورك
بجد انت رأيك صح اهم حاجه في الزواج اننا منلغيش عقلنا واهم حاجه في الاول العقل وبعدين نشوف الحاجات التانيه واكيد الحب بيجي فعلا للراحه والتفاهم ويا رب يوعدنا بدة كله يااااارب
بجد بوست جميل وهايل
نتشرف بدعوة سيادتكم والأسرة الكريمة لحضور إفتتاح المدونة الصاعدة بإذن الله .. كلماتى .. والعاقبة عندكم فى المسرات ..
حضروكم يسرنا ..
ودخانكم يضرنا ..
الدمعة
تحياتي وسعادتي لاتفاقنا في الراي وربنا يديكي اللي تتمنيه
شكرا لمرورك
ياسر سليم
شكرا لمرورك ومبروك المدونة
أتفق معك تماما في الرأي .. عارف انا واحدة صحبتي كان جيلها عريس جواز صالونات يعني .. الولد كويس جدا بس شقتوا صغيرة وقالها انو هيغيرها بعد شوية لما ظروفوا تتحسن هي بقى لا ازاي انا ايه اللي يخليني اتنازل واتجوز واحد شقتو صغيرة .. مع ان الولد شخصية طموحة ومتدين .. حاجة غريبة اوي في بجد بنات مش بيقبلوا اي تنازلات طالما مش راضية تتنازلي في دي امال بعدين هتعملي ايه في حياتك.. وللاسف في من ده كتييييييير
معلش طولت عليك بس اصل موضوع البوست بتاعك ده مهم جدا فعلا
تحياتي
طب والملل تعمل فيه ايه
الراجل ليه بيمل من مراته دايما مهما كانت كويسة؟؟
وتسمع الرجالة يقولوا انا نفسى اتجوز تانى .. طب ليه مراتك تاعباك؟؟ .. لا دى زى الفل بس تغيير اصل الواحد مل
مش دة برضه اللى بيحصل؟؟
تحياتى
ايامنا الحلوة
دي مشكلة من ضمن المشاكل الكتير الموجودة اننا مش قادرين نفهم يعني ايه جواز وايه هدفه وايه اسباب استمراره واصبح الامر مجرد نزوات للطرفين او الخروج باكبر قدر من المكاسب
تحياتي
ياسمين
دي اسمها طفاسة – سواء كانت من الراجل او من الست – وتقولي ايه للست اللي تسيب بيت وزوج محترم ملبي كل طلباتها وموفر ليها حياة كريمة ولاولادها لمجرد العند والكبر
تحياتي
انا معاك
ان زواج اساسه العقل والقلب
بس مش كتير بيقدروا ينجحوا في الجمع بين الاتنين
معظم التجارب
اما بيكون الحب هو المسيطر مع عدم وجود العقل
ودا بيسبب مشاكل كتير جدا بعد الزواج
لان كل واحد فيهم كان بيشوف في التاني صوره لملاك راسمها قلبه
وبيفاجأ بحقيقه تانيه ممكن تكوت مره
والحالات الاخري بيكون زواج بالعقل وبس
يعني بتتحسب بحسابات ماليه اكتر منها شعوريه
زي ما قولت جميله وعندها صيدليه
ولا مدرسه وبتدي دروس خصوصيه
يعني كلها ماده
ولو ربنا كرمهم وجه الحب بيكون خير وبركه
لكن للاسف الراجل او الست بيلاقي نفسه انه معش سنه ولا حس بالحب الي بيشوفوا في التلفزيون
فبيبدتي يدور عليه بره
وكذلك المرأه علشان نكون منصفين
الي عايزه اقوله
ان العقل والقلب
الاتنين لازم يكونوا موجدوين
زي ما قولت تمام
بس للاسف هيا حسبه صعبه وشبه مستحيل تحقيقها
عتاب بقي
ما عدتش عليا ليه بالعربيه علشان تقولي ان البوست جاهز وموجود
كل دا علشان البنزين يا سندباد
ماشي يا سيدي
تحياتي كتير اوي
دايما معتبرة إن الجواز ده حاجة تخوف جدا
كتير بحس إن مش الفروض أبدا يبدأ بالحب
المفروض يبدأ بالعقل تماما و مع إستعداد للتقبل و الحب.. إنما الحب من البداية رغم روعته و جمال احساسه و إحتياجنا ليه جدا
إلا انه مش فمصلحة أي من الطرفين
لإنه حايكون إندفاع يعمي عن سلبيات واضحة أحيانا
جهينة
فعلا معادلة صعبة بس وهو من امتي في الدنيا حاجة سهلة من ساعة ما بنتولد وكل حاجة صعبة اوعي تفتكري ان الطفل الصغير علشان في حد بيخدمه بتبقي المسالة عنده سهلة هو كمان بيحس بالصعوبة بس بطريقة تانية يمكن صعب تتشرح انما الصعوبة في كل حاجة صدقيني وبعدين اذا مكناش نتعب علشان نحقق سعادتنا نتعب ليه بس هي المشكلة هل ياتري الطرف التاني مستعد يتعب هو كمان وياتري هايقدر التعب ده صعب مش كده
مش قلتلك ان كل حاجة صعبة
وعندك حق في عتابك عدت عليا معلش بس اوعدك ان اي بوست هاينزل لازم تكون اول واحدة تعرفيه
تحياتي
هنودة
رغم متعة الحب واندفاعه وروعتة الا ان العقل مهم جدا جدا في كل حاجة بس اوعي تقولي ان الزواج يخوف بالعكس عمر ما ربنا خلق حاجة تجيب شر احنا اللي بنحول الخير للشر لو احسنا الاختيار وحكمنا عقلنا وحطينا ثقتنا في ربنا اكيد هاننجح وبالتوفيق
تحياتي
ولا ننسي قول الحبيب محمد عليه الصلاة والسلام إذا جاءكم من ترضون دينه وخلقه فزوجوه
مين بيطبق هذا الحديث دلوقت؟؟
من جائكم ترضون فلوسه وشقته الجاهزة وشبكته الغالية مرمتوه وخلوه يدفع كمان
الف الف خسارة
فبركة
ياخسارة علي كل حاجة حلوة كانت جوانا ربنا يرحمنا
تحياتي ونورتني
اعتقد انه اهم حاجه من وجهه نظرى فى الزواج
التفاهم
التفاهم
التفاهم
اهم شئ بجد
لانه لو فاهمنى اوى يعنى انه تفكيره زى تفكيرى
وكمان تدينه بمقدار تدينى
و تحره بمقدار تحررى
عاداته وتقاليده هو لنفسه تعادل عاداتى وتقاليدى انا كشخص بغض النظر عن عادات وتقاليد المجتمع
يعنى وحاجات كتير اوى تانيه بتندرج تحت نفس المسمى
"التفاهم"
بجد دا بالنسبه لى اهم شرط
واعتقد انه فعلا زى ما قلت انه ناس كتير اوى بتاخد الزواج بمبدا انه ضروره يحتمها المجتمع او المنحيطين بيه فقط
ومش عشان هو او هى اصبح بجد حد اهل لانه يتحمل او تتحمل مسئوليه بيت
شكرا ليك واسفه على التطويل
شكرا
:)
ساعة غروب
اولا شكرا علي النصيحة اللي اديتهالي لما علقت علي بوست حالة سكون ثانيا شكرا علي اهتمامك بزيارة فكرتي المتواضعة
ثالثا ورابعا وخامسا عندك حق اكيد في كلامك التفاهم بيقصر المسافات الكتيرة اللي بين الطرفين والاحساس بيعلي حالة الحب بينهم ولو انتي قريتي البوست اللي نزلته قبل كده عن العشق والهوي والاحساس هاتفهمي كلامي اكتر وربنا يرجع جوانا الثقة والحب للناس بينهم وبين الناس وبينهم وبين نفسهم ومطولتيش بالعكس نورتيني
تحياتي
ايه البوست الجميل ده.....
انا برضه مع زواج القلب العاقل لان الحب لوحده لا يصلح من طباع شخص فيموت مع العشرة...و اهم حاجة في رايي هو ائتلاف الارواح و الراحة النفسية هي اساس للتفكير السليم و الحب الدائم
تحياتي
انا جايه اصبح بقي المره دي
عندك حق كل شيء صعب
بس الصعوبه دي هيا الي بتخلي الواحد يحافظ علي الي تعب علشانه
بيني وبينك الي بيجي سهل بيروح سهل برضه
وعمرنا ما نحس بقيمته الا لو تعبنا فيه وعانينا
هيا الدنيا كدا غاويه تتعبنا معاها علشان نكون سعداء
يلا ياسيدي
وخلاص قررت المحكمه اخلاء سبيل عن سندباد بضمان محل اقامته وتعويض مالي مقدار عشره قروش فقط لا غير
رفعت الجلسه
حلو كدا؟
انفع محامي يعني؟
تحياتي يا سندباد
تعرف واللهي يا سندباد بحس اني بتصرف بعبط علشان في حاجات كتيرة بجي على نفسي فيها بس واللهي لما بحكي لحد على المواقف دي بلاقي منهم اللي بيحسسني اني مازلت اتمتع ببعض العقل وان في بعض الامور التضحية فيها بتكون اساس لللاستقرار وليس كما تظن بعض البنات ..تحياتي لموضوعاتك التى لها الكثير من الفائدة
السلام والتحية
أول مرة ليا فى مدونتك وبعد تصفحها كلها -- احب اهنيك واهنى نفسى بمعرفة شخصية جميلة زيك
انا معاك ان ليس فى كل الاوقات الزواج التقليدى بينجح او زواج الحب
هو اهم حاجة فى الجواز التوافق فى جميع المعايير وبكل المقاييس
فى جواز الحب لازم يكون العقل حاضر علشان الدنيا تمشى صح ومنسيبشى القلب يلغى العقل ونطبق مراية الحب عامية لأنها بتصحصح بعدين، وبرده مينفعشى فى الجواز التقليدى اننا نلغى القلب لأن لازم زى الرسول مقال يكون فيه قبول بين الطرفين وتوافق ذهنى على الأقل
بجد وعن تجربة الجواز مش سهل خالص ولازم يكون فيه توافق كبير بين الطرفين علشان المركب تمشى صح ومتغرقشى منهم، وبرده على كل أم وكل أب أنه يعلم بنته وأبنه يعنى ايه جواز ومسؤليه - كتير قوى بيصطدمو بحائط الواقع بعد الجواز وميعرفوش انه هو ده الأساس للى المفروض يحافظو عليه.
تحياتى وإلى لقاء آخر
هبة
نقطة ميه
تحياتي وسعيد لاتفاقنا في الراي وحلو المصطلح اللي انتي قلتيه زواج القلب العاقل فعلا هو ده المسمي الصحيح
تحياتي ليكي جدا
جهينة
والله انا فرحت اوي لما لقيت تعليقك النهاردة اصلي افتكرت ان فيها اعدام ربنا يخليكي لينا ويعليكي ويديكي كل اللي تتمنيه قادر ياكريم
دعوتين عشرة علي عشرة بلاش بقي العشر قروش علشان الظروف وكده
علي فكرة انا اشتغلت محامي 8 سنين يعني اي استشارة قانونية انا تحت امرك ومجانا
قلوب حائرة
عارفة طالما احساسك من جوه صادق ومتاكده من انك صح سيبك من كلام الناس احنا بنعمل الصح علشان خاطرنا احنا مش علشان خاطر الناس ومش بنعمل الصح علشان نفهم غيرنا انا عملنا الصح ليك لاء احنا بنعمل اللي معتقدين بيه واللي ربنا امرنا بيه وبعدين من امتي كانت التضحية او التسامح شئ وحش اوي او انها حاجة مجنونة مش عاقلة بالعكس انا اعتقد ان الشخص المسامح في منتهي العقل لان ربنا بيقول " والكاظمين الغيظ والعافين عن الناس " صدق الله العظيم
خليكي في طريقك الكلاب تعوي والقافلة تسير
تحياتي
هبة
متشكر علي ذوقك واطراءك ومدونتي شرفت بيكي جدا جدا واتمني اكون عن حسن ظنك دائما
عجبني اوي تحليلك للبوست وتلخيصه في جمل بسيطة وعن تجربة انا كمان الزواج مسؤلية كبيرة جدا جدا والمشكلة ان محدش فاهم وربنا يرحمنا ومنتظرك دائما في فكرتي
تحياتي
بالطبع انا في رائي ان زواج العقل هو احسن زواج
عمرو
شرفتني ونورتني وزي ما قلت لكل اللي علقوا علي البوست دي وجها ت نظر
تحياتي
عزيزي سندباد
فعلا الجواز مش مجرد عقد عند مأذون
للاسف الناس فاهمه الجواز غلط و مش بتحاول انها تتمعن في معانيه بجانب انها تفكر في تبعاته و مسؤلياته و بيكونوا فاكرين ان الجواز ده سهل و اول مايتجوزوا و يبتدوا يواجهوا الواقع بيلاقوا ان فيه حاجات كتيره جديده عليهم و بيفاجأوا بيها عشان هما اساسا تسرعوا في الجواز قبل مايدرسوا بعض كويس و يتعرفوا علي بعض كويس و ده اول حاجه دايما بقول ان لازم يكون فيه توافق فكري و عقلي و روحي بين طرفي اي علاقه عشان تستمر
الحب وحده مش كفايه مهم بس مش كفايه عشان في اول العلاقه الحب بيكون كبير اوي و العواطف جامده و وواحده واحده بتلاقي ان الدنيا بتهدي و لو مفيش اسس ثابته للعلاقه حتنهار بسرعه
لازم اي اتنين مقبلين علي الجواز يفكروا في ده و في حاجات تانيه كتير عشان جوازهم يعيش و يدوم زي ابائنا و اجدادنا
تحياتي للبوست المميز و المعلومات المفيده
احييك بشده على البوست ده
عجبني جداَ
ورصدت المشكله بشكل مبسط وسليم
قرب من عقلنا الفكره
بس برضه عاوزه اقول حاجه
فكرة الخطبة نفسها كبداية للإرتباط وكونها مفروضه كشكل لبداية علاقه
من اهلنا
ومجتمعنا
باسترخمها
ايه المشكله ان ده يحصل بين
الصحاب
اللى هما فى الصل عارفين بعض كويس
مش عارفه وصلتك الفكره ولا لا
تحياتى يا سندباد
اجندا حمرا
احييكي علي تعليقك السهل الواضح فعلا احنا مش قادرين نفهم اهمية وقدسية الجواز وفكرينه انه مجرد فرح وكوشة ومعازيم انما هو ليه هدف اسمي بكتير من كده
تحياتي الشديدة ليكي
همسة
شكرا علي ذوقك واطراءك وانا وصلتني وجهة نظرك وهي ممكن تبقي مفيدة انما منساش ان الخطوبة دي سنة
تحياتي جدا ليكي وعلي مرورك واهتمامك بزيارتي وارجو الاستمرار
سندباد
تحياتي ليك ولموضوعك المهم
فعلا الحب لازم يكون بقلب محكوم بالعقل ومش العكس..انا ضد الجواز التقليدي بصراحة لان تزييف الحقايق فيه سهل اوي
احسن حاجة انه يكون في حب لان الحب هيجي من التفاهم والتقارب ومن هنا يبدأ دور العقل اللي يحددلنا الطريق الصحيح الله هنمشي فيه
تحياتي ليك
محمد سمير
غمض عنيك
شكرا لمرورك الكريم لافكاري المتواضعة وانشاء الله التواصل يستمر وزي ما قلت لكل اللي علقوا علي البوست ان دي وجهات نظر قد تختلف وقد تتفق
تحياتي
انا معاك ان العقل هواللى بيخللى الجواز يستمر بس الحب مهم جدا وهو اللى بيدعم العقل عشان الحياة تمشى وممكن تتجوز جواز تقليدى وفى ارتياح عادى وتقول بعد الجواز حييجى الحب , بس ممكن مش ييجى وتضطر تكمل حياتك مع حد مش بتحبه عشان بقى فى اولاد هنا بقى العقل بيظهر رغم ان مفيش حب وفى ناس تانية مش بتحكم عقلها ولا بتفكر فى اولادها وعايزة تعيش حياتها وهنا بقى لا فى عقل ولا قلب ... انا بفضل الجواز عن حب - رغم انى اتجوزت صالونات - اهو على الاقل فى حاجة تهون علينا المشاكل
سؤال صعب
أحيانا بنقول هنعمل وساعة الوضع في الموقف
بتتغير أفعالنا
لكن نقدر نقول مينفعش نلغي واحد على حساب الثاني
ليكونوا موجودين بنسب متفاوتة لمينفعش نخليها واحد فيهم بس
جواز عقل بس يعني جواز ثلجي
وجواز قلب غالبا بيبقى فيه طرف بيتنازل أكتر من التاني
وأحيانا بيطصدم بحقائق الحياة بعد الزواج
فالوسط أو القرب من الوسط أعتقد هو الأنسب
تحياتي لكَ
فليحيا زواج العقل
الحب أعمى وهايخلينا نتنازل عن حاجات كتير ارضاءً لمشاعر جوانا
انما العقل بيشوف ويسمع ويحكم صح (مش دايما طبعا)وكمان هو الى بيبعت الإشارات للقلب عشان يدق
انا برده صادفت زيجات حب كتير انتهت بسرعه الحب محتاج عقل يقويه
:)
بوسي كات
هارد عليكي زي ما رديت علي معظم اللي علقوا دي وجهات نظر تحتمل الصواب وتحتمل الخطا
تحياتي علي مرورك
نهي جمال
انا متفق معاكي قليل من العقل قليل من الحب
تحياتي
واحدة من الناس
انتي داخلة مظاهرة علي العموم دي وجهت نظر
تحياتي
إرسال تعليق