الاثنين، 16 يوليو 2007

انه تاج


جائني هذا التاج من صديقي حزين يقدرني ربنا علي الاجابة وشكرا له ولكم
انت مين ؟
راضي صابر بس نفسي ارتاح
انت ايه؟
انسان
هدفك فى الحياه ايه ؟ هدفك الكبير فى الحياه غايتك يعنى ؟
ان يرضني الله بما يرضي ورضا الوالدين وان ارضي عن نفسي
اول طموح نفسك تحققه ؟
احافظ علي ما وصلت اليه حاليا
انت سعيد ؟؟؟؟؟؟؟؟؟؟؟
لاء بس الحمد لله
امتى بتكون سعيد وضميرك مرتاح ؟؟؟؟؟؟؟؟؟
قليل اوي لما بحس اني سعيد انما لما احس اني نجحت في رسم بسمة للاخرين واحس بنظرة الرضا والشكر في عيون الناس ليا ضميري بيرتاح
امتى تحس انك مميز ؟؟؟؟؟؟؟؟؟؟؟
كل واحد فين مميز في حاجة معينة
ايه اكتر حاجه ممكن تضايقك ؟
الظلم وعدم التسامح
ياترى همك فى الحياه ايه ؟ رضا ربك ؟ رضا اهلك ؟ رضا الناس عنك ؟ اشباع رغباتك ؟ ولا ايه ؟
رضا الله اهم حاجة تشغل تفكيري دائما وبالتالي فان علاقتي مع اهلي والناس ورغاباتي تكون دائما من اجل رضا الله
هل تحب نفسك ؟ هل تحب ان يمدحك الاخرون ؟ معجب بتفكيرك وامكانياتك ومواهبك ؟
احب نفسي طبعا لاني اذا كرهت نفسي فلن احب احد فاقد الشئ لا يعطيه وانا احب ان احب واتحب
هل تتضايق من الانتقاد ؟ هل تتحدث عن نفسك كثيرا حتى مع نفسك ؟
بالعكس احب اعرف عيوبي فين واتحدث مع نفسي عن نفسي كثيرا انما امام الاخرين فانا رجل صامت
هل انت كثير الكلام ام صموت ؟
انا رجل صامت
ماهى الصفات غير التقليديه التى ترغبها فى شريك حياتك ؟ الصفات غير التقليديه يعنى بعيد عن كلمة متدين واخلاق وحنين وطموح ورومانسى ويحفظ كرامتى ويكون بيبحبنى والحاجت دى حاجات غيرتقليديه زى مثلا شقيه نومها خفيف منصت جيد عصبى الخ؟
قادرة علي التسامح وتعلم انها تحب انسان له اخطاء
سؤال للشباب ممكن تتجوز بنت كانت ليها زمايل غيرك ؟
يعني ايه زمايل غيري
ممكن تتزوج بنت اكبر منك والبنات ممكن تتجوزى شاب اصغر منك ؟
صعب شوية
ولو لأ يبقى ليه ولو اه هل فى صفات معينه عايزاها تعوض فرق السن ؟
معرفش صراحة لاء ليه
هل تحب الراحه والكسل ؟
احيانا
هل اعدائك او منافسوك يحترموك ؟
ليس لي اعدا ء
ما مساحة الجد من الهزل فى حياتك ؟
تقدر تقول ان في توازن
عارف وزنك ؟ قيمتك ؟ امكانياتك ؟
رحم الله امرؤ عرف قدر نفسه
هل تلتمس الاعذار ام تحب ان تعاتب ؟ هل انت مهموم ؟ او تخلق الهموم؟
اعطي لاخيك الف عذر
انا انسان دائما مهموم
ولكن لست من هواة تعذيب نفسي
ما النسبه بين جواك وبراك ؟
مش فاهم السؤال ده
هل انت عنيد ؟
اطلاقا
هدفك من التدوين ايه ؟ بتابع اى مدونه صاحبها بيتابعك ولا بتهتم بالمدونات اللى بيعجبك محتواها ؟
اتكلم عن اللي نفسي اتكلم فيه من غير ما حد يقولي بس ، بهتم باي كلام جميل وهادف

ممكن تساهم فى نشر مدونه جيده غير مشهوره ؟ لو اه او لأ ليه ؟
اكيد لان ده اللي حصل معايا فصديقي كاسبر هو سبب دخولي عالم التدوين وانا من طبعي احب التعاون ومساعدة الاخرين
ايه نوع المدونات المفضل لديك ؟
كل مدونة فيها جديد وليها هدف ومنهج بتبقي مفضلة لديا
بتحب اكتر تتعامل مع مدونين رجال ولا مدونات بنات ؟ وليه
اتعامل مع العقل
تفتكر مستقبل التدوين هيكون ايه ؟
اعتقد انه هايكون ليه تاثير كبير علي افكار الشباب وممكن يكون وسيلة للتغيير في اشياء كثيرة في مصر
ممكن تنشر لمدون تعرفه فى الصحف او تساعده فى نشر كتاب حتى لو هيتفوق عليك او هغطى عليك بفرض انه جدير بهذا ؟ اجب بصراحه
ليه لاء انا نشرت في مدونتي اشعار لاخرين عادي جدا
ايه حجم اقتناعك باللى بتكتبه فى مدونتك كل اللى بتكتبه واللى بتعلق عليه ؟
انا بكتب اللي بحس بيه

وهل لو قريت عند حد بوست معجبكش اوى هتعلق تقول ايه ولا مش هتعلق خالص ؟
حسب علاقتي بصاحب البوست لان في ناس بتزعل من النقد
ايه حجم صراحتك فى اجاباتاك على هذه الاسئله ؟
الحمد لله انا راضي عن اجابتي
اخر سؤال لو الرسول (ص) هيزورك لمدة اسبوع ايه الحاجات اللى هتبطل تعملها وايه
الحاجات اللى هتحبه يشوفك بتعملها غير العبادات المعروفه ؟ وهتعامل ابوك وامك واهلك قدامه ازاى وهتعامل اصدقائك قدامه ازاى وهتعامل الناس وتتعامل فى شغلك ودراستك وحياتك والتليفزيون قدامه ازاى ؟ وهتقوله ايه عن مدونتك ؟ وهتضيع قدامه وقت اد ايه فى التدوين ومتابعة المدونات ؟لو سيدنا محمد عليه الصلاة والسلام قدامي مش هاعمل اي حاجة غير ان اقعد اسمعه واشوفه بيعمل ايه مش هاتكلم ولا اعمل حاجة هاتعلم منه بس
لو فى سؤال كان نفسك تتسأله ومجاش هنا يكون ايه وجاوب عليه ؟
انت سالت عن كل حاجة


هناك 24 تعليقًا:

حزيــــــــــــــــــن يقول...

مش ممكن التاج بتاعى وكمان اول تعليق
ايه يا عم انت غيرت انطباعى عنك خالص
مهموم ليه ؟ حزين ليه ؟ صامت ازاى امال كل التدوينات دى ازاى
واقف مكانك ليه ؟
اتحرك
وعايزها تكون متسامحه وتعرف انها ستتزوج واحد له اخطاء
جمله رائعه
ربنا يكرمك ويحفظك ويرشدك
انت ممررتش التاج لحد يعنى

سندباد يقول...

عزيزي حزين
دخولي التدوين هو بداية التحرك والتغيير شكرا علي التاج الجميل ده والتاج متاح لكل من يريد وربنا يجعلة مش اخر التاجات
تحياتي

رينـــــــــــا يقول...

ينهااااااااااار
دا كل سؤال فيه ميه سؤال هههههههههههههه
لا بجد وبدوا مجامله اجاباتك مختصره وتوصل المعنى دون مط وتطويل


ربنا يفرج عنك حزنك
ويرزقك بما يحب ويرضى وبما تحب وترضى
وان شاء الله الى الامام
والصمت دليل على الذكاء على فكرة
الناس اللى بتسمع اكتر ما تتكلم دى
دليل على انها انسان عاقل متزن غير متسرع وبيوزن الامور وبيتعلم من غيره

تقبل تحياتى :)

Doba يقول...

انت رمانسيتك المفرطة سبب عذاب قلبك ولأن قلبك معذب فانت دايما حزين وصابر

حاول صديقى الأستمتاع قليلاً فإن الله حبانا بكل النعم التى تجعلنا نستطيع أن نمضى قدماً للأمام وحبانا بنعمة الإنسان ولكن شيطانك هو من يجذبك دائماً لقاع الحزن والمرار والأسف

أبشر أخى العزيز فإن فرجه قريب طالما تسعى للوصول إليه

تحياتى يا سندباد يا طاير بين العباد
هبة

NeRmeeN يقول...

ايه الشجن ده كله يا سندباد...بس عموما التاج ده فعلا مختلف و اجباك عليه ماكنتش تقليدية زى ما بيحصل دايما
بس نصيحة منى حاول تظبط شوية كتبته وخلى السؤال بلون و الاجابة بلون و خلى فى شوية مسافات ..عشان يكون مريح للعين :)

تحياتى

سندباد يقول...

رينا
فعلا هو تاج طويل بس المهم اني اكون قدرت اجاوبه وكوويس انكم استحملوتا اجابتي
تحياتي

سندباد يقول...

دوبا
وبشر الصابرين
وانا صابر وثقتي في ربنا مفهاش جدال او نقاش
شكرا علي اهتمامك
تحياتي

سندباد يقول...

نرمين
تحياتي لمرورك الكريم وسيراعي العمل بالنصيحة المرة القادمة
شكرا ياعزيزتي

ضـوء الـقـمر يقول...

اممممممممممممم
شكل كده فيه تفرقه عنصريه
فين التاج بتاعي يا استاذ
هتجاوبه يعني هتجاوبه غصبا واقتدارا :P

بالنسبة للتاج ده بقه
رغم انها تقريبا اجابات مختصرة بس وصلتلنا المطلوب
تحياتي

سندباد يقول...

ضوء القمر
مش ناسي والله وهاجاوبة يعني هاجاوبه قمرك نور مدونتي
تحياتي

shahy يقول...

اية حكاية التاج دة

هو هاينكد عليك تاني والا اية؟

لأ احنا كنا بقينا كويسين والحزن بعد عننا شوية

ركز تاني واكتب لنا حاجة حلوة مفرحة

اخر حاجة
لو كنت كتبت السؤال بلون تاني غير لون الاجابة كنت ريحتني وعرفت افرق بينهم

تحياتي يا صاحب القلب الحزين والصمت الرهيب

نـــــــور يقول...

اجابات جميلة ماشاء الله رغم انها مختصرة

على فكرة انا بحس إن الحزن هوا اللي بيطلع طاقات الكاتب الكامنة ، وإن كل ما الواحد بيحس بالحزن أو الهم أو الاكتئاب أو الغربة أو الوحدة .. كل ما طاقات جواه بتتفجر وبتخرج عبر القلم من خلال روائع .. لو قد 100 سنة وهوا مبسوط مش هيعرف يكتبها

دلوقتي أنا عرفت ليه كتاباتك عجبتني جدا وليه عليها لمسات مش موجودة في كتابات تانية

لكن برده مش معنى كدا ان الواحد يكون حزين دائما ، ومش معناه كمان إن الواحد لو مبسوط مش هيعرف يكتب كويس ..لكن بحس ان الحزن بيضفي لمسة ابداع على الكتابة

آسفة على الاطالة ..وتحياتي دوماً

Noony يقول...

الإجابات ما قل ودل
بتدل على شخصية متزنة بس حزينة

ربنا يفك كربك يا رب

رسمت البسمة على وجهي
:)
نوني

نفسنا يقول...

ندعوكم لزيارة العدد الثالث لمجلة نفسنا

سندباد يقول...

شاهي
مفيش نكد ولا حاجة انا زي الفل ومعلش تعبت عنيكي سيراعي التنسيق المرة القادمة
تحياتي ياعزيزتي

سندباد يقول...

نور
شكرا ياعزيزتي علي اهتمامك بفكرتي المتواضعة وشركا علي مرورك الكريم وافعلا احيانا اللابداع بيكون وليد الحزن شئ غريب مش كده ربنا يفك كرنا كلنا
تحياتي

سندباد يقول...

نوني
سعيد بوجودك وربنا دايما يرسم البسمة علي وجهك تحياتي

سندباد يقول...

نفسنا
شكرا للتواصل

غير معرف يقول...

اجابتك عرفتني حاجات كتير عن شخصيات كنت عاوزة اعرفها وان مكنتش قدمت كل ما اريد ان اعرفه عن صاحب مدونة بتباعها ربنا يكرمك يارب ويحقق ليك كل ما تتمني ويزيل همك ويرضي ربك واهلك عنك تحياتي لجباتك التي توقعتها بكل ما فيها من احرف

فى القلب يقول...

سندباد
أجباتك عن هذه الاسأله
عرفتنا أكتر عن شخصيتك ودى فايده التاجات أن تعلم أكثر عن ناس راقين وحساسين مثلك
ربنا يوفقك فى حياتك
وتنول كل ما هو خير لك

Lemonada يقول...

أخبارك يا عم
معلش متأخرة عليك المرة دي
بس والله مش بيدي
اصلي ماسكة شغل جديد وقال اي مديرة
ههههههه
لازم اثبت نفسي
الله يستر
اتمنى تزورني في كل من قوس قزح و ليموناضة
واعزرني لو اتاخرت
تحياتي
ومتشكرة على متابعتك ليا

سندباد يقول...

قلوب حائرة
متشكر علي كلامتك الجميلةوربنا يفك همنا وكربنا جمعيا ، بس ازاي توقعتي او قدرتي تحددي شخصيتي زي ما قلتي

سندباد يقول...

في القلب
متشكر جدا علي رقتك وذوقك وربنا يسمع منك

سندباد يقول...

ليموندا
ربنا يعينك ويوفقك في كل ما هو جديد
وانا دايما متابع
تحياتي