الاثنين، 11 أكتوبر، 2010

رباعيات السندباد - مع الاعتذار لعم صلاح جاهين


أحيانا بحس أن الدنيا صغيرة قوي
أفرد دراعتي وأدفي بنور الشمس
وساعات بخاف من الليل الطويل
أحسني محبوس لا صوت ولا همس

***********************
لما أحزن الاقي الدمعة صاحبتي
ولما أفرح مطولش حتي ضحكتي
أسيب نفسي للتيار ؟
ولا أصرخ وأقول يالهوتي

***********************
كان فاكر نفسه واد مفتح وحويط
دايس فالدنيا وأتنطط فيها تنطيط
قال أحب بقي ويبقي ليا حبيب
إضحك عليه ياعيني طلع طيب وعبيط
***********************
بحط أيدي في جيوب الدنيا أسرق فرحتي
أجري من الناس وأقعد أسمع ضحكتي
ساعات تعلي وتعلي وتبقي غنا
وكتير تتخنق وتموت علي شفتي

*******************
صحيت النهاردة لاقتني مش أنا
وكأن عمري بقي ألف سنة
العيب فيا ولا في دنيتي
ولا الحمل زاد عليا أنا
******************
ساعات كده وقت الحزن تلاقي البكي بيريح
وساعات يزود جرحك يقعد علي قلبك ويريح
يألمك ويسهرك في ليلك تقعد تكلم نفسك
متلقيش إلا الفضفضة هي اللي تهديك وتريح

********************
صاحبت الصبر يمكن يهديني
وفوق الشوق يقدر يعديني
لقيت الصبر ما صبرني
ولا وقف دموع عيني
*******************
جوايا كلام كتير ويجي ميت سؤال
ليه الحزن جوايا عامل زي الجبال
ليه جروحي سكناني ليل نهار
كل ما أدواي جرح يتولد غيره في الحال

*******************
جايب ليكي من بستاني أنا ألف وردة
جمعتهم بإيدي وكل ورده عليا شاهدة
رحت ليكي أجري وشوقي سابقني
لقيت مكانك فاضي غايبة ومش قاعدة

هناك 47 تعليقًا:

الحب الجميل يقول...

حلوة رباعيات السندباد دى
لما احزن الاقي الدمعة صاحبتي
ولما افرح مطولش حتي ضحكتي
اسيب نفسي للتيار ؟
ولا اصرخ اقول يالهوتي
كله جميل
تسلم ايدك
تحياتى

سندباد يقول...

الحب الجميل
زيارتك الدائمة هي اللي جميلة متشكر لمرورك وتواصلك الدائم المتسمر
تحياتي ليكي والف مبروك لاخت حضرتك
تحياتي
نورتيني

Ms Venus يقول...

جوايا كلام كتير ويجي ميت سؤال
ليه الحزن جوايا عامل زي الجبال
ليه جروحي سكناني ليل نهار
كل ما أدواي جرح يتولد غيره في الحال


الله عليك يا سندباد


بجد كلمات جميلة جدا جدا


سلم قلمك واحساسك

تحية ليك

الــحــــنـــــــــــــــــــين يقول...

جايب ليكي من بستاني أنا ألف وردة
جمعتهم بإيدي وكل ورده عليا شاهدة
عجبتنى اوى اوى بجد تحياتى ليك يا استاذنا

mrmr يقول...

صحيت النهاردة لاقتني مش أنا
وكأن عمري بقي ألف سنة
العيب فيا ولا في دنيتي
ولا الحمل زاد عليا أنا

هو صحيح العيب فى مين

الله عليك وعلى ربعياتك يا سندباد

karmen يقول...

جميلة جدا سندباد
تجربة جديدة واسلوب هايل كالعادة
تسلم ايدك
¥k¥

Mona Abo - Elso3od يقول...

ساعات كده وقت الحزن تلاقي البكي بيريح
وساعات يزود جرحك يقعد علي قلبك ويريح
يألمك ويسهرك في ليلك تقعد تكلم نفسك
متلقيش إلا الفضفضة هي اللي تهديك وتريح

مش قادرة اقول غير " الله " " اعد "

داليـ ـ ـ ـ ـ ـ ــــا يقول...

ايه الجمال ده
احب انا الكلام الا نطقه بسيط ومعبر ده
لاء بجد ياسندباد تحفه تحفه
مافيش ولا كلمه
اى كلمه هقولها مش هتوصف حلاوة الكلام

حرّة من البلاد..! يقول...

كلام يدل على عمق الجراح والألم ,كم من مرة ستموت على شفاهنا الضحكات وكم من مرة سنداري الدمع في الضحكات

كلامك ابداع ينبض صدقا وألما
مع أني أحب الفصحى ولكن كلماتك جذبتني ولها وقع خاص

دمت بخير أخي

rack-yourminds يقول...

صديقي....بجد مدونتك هي المكان الذي اجد فيه الكلمه الرقيقه والجميله والمشاعر الصادقه
____________

تسلم ايدك

خواطري مع الحياة يقول...

السلام عليكم
انت كده كل مرة بتخليني اعجز عن الكلام عن التعبير
كلام بمنتهى الروعة حتى هذه الكلمة قليلة عليك
بصراحة رباعيات بتعبر عن الي جوايا هو كلنا كده
كل شخص في بداخلة هذه التساؤلات هذا الكلام
ربنا يوفقك ويسعدك ويبعد عنك الحزن
تقبل مروري
سلامي

سندباد يقول...

ms venus
كلنا جوانا اسئلة وكلام كتير وفقدان لحاجات كتيرة حلوة جوانا
ربنا يكون في عونا
سعيد بوجودك الدائم لسفنيتي المتواضعة
تحياتي
نورتيني

سندباد يقول...

الحنين
سعيد بوجودك وتعليقك الجميل ياحنين التدوين
تحياتي ياصديقي
نورتني بجد

سندباد يقول...

mrmr
فعلا هو صحيح العيب في مين في اخلاقنا وتربيتنا واللي قالوا لينا ابهاتنا وامهاتنا ولا في الزمن والتطور والرقي والحضارة ولا فينا احنا الاتنين
تحياتي لمرورك
نورتيني

سندباد يقول...

كارمن
دليما منوراني ومشرفة السفينة سعيد بوجودك الدائم وربنا يقدرني دايما واكون عند حسن ظنكم
تحياتي
نورتيني

سندباد يقول...

مني ابو السعود
شكرا لذوقك وتعليقك الجميل وشكرا لزيارتك الجميلة دايما
وربنا يبعد عننا وعنكم البكي
تحياتي
نورتيني

سندباد يقول...

داليا
ربنا يخليكي ويخليلي زيارتك الجميلة وتعليقك الاجمل وربنا دايما يقدرني واكون عند حسن ظنكم
متشكر اوي
تحياتي
نورتيني

سندباد يقول...

حرة من البلاد
كلنا مجروحين وضحكتنا تايهة من الحزن والالم ربنا يكون في عونا ويدينا القدرة علي التحمل
تحياتي الخالصة
نورتيني

سندباد يقول...

راك
متشكر ياصاحبي متشكر علي ذوقك واهتمامك وسؤالك ربنا يقدرني وارد جمايلك عليا
تحياتي ياصاحبي
نورتني

سندباد يقول...

خواطري مع الحياة
ربنا يعفو عنا ويرحمنا ويلهمنا سبيل الرشاد والهدي ويبعد عننا غضبه ويدينا القدرة علي التحمل
الحمد لله علي كل شئ
متشكر جدا جدا علي ذوقك وتعليقك الجميل
تحياتي الخالصة شرفتيني بجد

Story pain يقول...

بحط أيدي في جيوب الدنيا أسرق فرحتي
أجري من الناس وأقعد أسمع ضحكتي
ساعات تعلي وتعلي وتبقي غنا
وكتير تتخنق وتموت علي شفتي

عجبتنى جدا الفكرة والابيات دى

تسلم ايدك

سندباد يقول...

story pain
متشكر علي مرورك وذوقك وربنا يقدرني دايما واكون عند حسن ظنكم جميعا
سعيد بمرورك الجميل
تحياتي
نورتيني

شيرين سامي يقول...

أبيات جميله و واضح ان شعرك العامي لا يقل روعه عن شعرك بالفصحه

سندباد يقول...

شرين سامي
متشكر لذوقك ومرورك الطيب
دايما منوراني
الحمد لله ربنا يقدرني واكون عند حسن ظنكم جميعا
تحياتي الخالصة
نورتيني

iـــــــــــsــــــــــlــــــــــــaـــــــــm يقول...

كلهم حلوين اوى يا سندباد

بس ادينا شويه تفاؤل يا عم سندباد

مش كله كده حرام عليك والله ما ناقص

يلا يا عم هستنى البوست الجاى تفاؤل

تحياتى ليك يا صاخبى

سندباد يقول...

اسلام صديقي
صدقني ياصاحبي بحاول ابعد عن المود ده ومش قادر انما انشالله يكون في تغيير
وربنا يعفو عنا ويرحمنا
تحياتي ياصاحبي
نورتني

عمرو يسرى يقول...

جوايا كلام كتير ويجي ميت سؤال
ليه الحزن جوايا عامل زي الجبال
ليه جروحي سكناني ليل نهار
كل ما أدواي جرح يتولد غيره في الحال


ايه الجمال ده
رائعه
تسلم ايدك

من كل بستان زهرة يقول...

بديعه جدا رباعياتك يا سندباد

مش عارفه اختار رباعيه معينه وأعلق على جمالها
كلهم أروع من بعض
بس ياريت المره الجايه تكون كلها تفائل وأبتسام

تسلم ايديك

سندباد يقول...

عمرو يسري
مشتكر ياصديقي علي ذوقك ومتشكر علي مرورك الدائم
دايما مشرفني ومنورني
تحياتي

سندباد يقول...

من كل بستان زهرة
متشكر علي ذوقك ربنا يخليكي
ويقدرني دايما اكون عند حسن ظنكم
انشالله يكون في تفاؤل وتغيير
بس قولي يارب
تحياتي
نورتيني

winter bird يقول...

السلام عليكم

جميلة الرباعيات ولو عمنا صلاح كان لساه موجود كان أعترف بك كأديب مبدع .

تحيتي لإبداعك .

سندباد يقول...

winter bird
وعليكم السلام ورحمة الله وبركاته
تحياتي وشكري لمرورك وتعليقك الرقيق
شرفتيني ونورتيني
متشكر مرة تانية
نورتي السفينة

شهرزاد يقول...

اعتذر اخي سندباد على التأخير
وااسف انني ضيعت فرصة التعرف على احساسك المرهف والصادق
اعجبني ما خطته اصابعك
وما عبرت به عن داخلك
اتمنى لك التوفيق والاستمرارية
تحياتي الصادقة

جايدا العزيزي يقول...

ياكسوفى

دايما متاخرة

بس بلحق السفينه

حقيقى اخى تسلم ويسلم احساسك

انا حافظه رباعيات صلاح جاهين

ورباعياتك

صدقنى ما تفرقش عنها كتير

اتقان براعه

الله اكبر وماشألله عليك

سعيدة اووووووووى بوجدى فى سفينتك

ايها القبطان البارع

اشكرك

تحياتى

سندباد يقول...

شهر زاد
لا داعي للاعتذار المهم وجودك الدائم في سفينتي وتعليقك الجميل
دايما منوراني ومشرفاني ربنا يقدرني واكون دايما عند حسن ظنكم
تحياتي الخالصة
نورتيني

سندباد يقول...

جايداالعزيزي
انا متشكر اوي لذوقك وتعليقك الجميل ربنا يكرمك وجودك شئ جميل في مدونتي ربنا يديمه انشالله وربنا يقدرني دايما واكون عند حسن ظن الجميع
سعدت بيكي بجد
تحياتي
نورتيني

د. ياسر عمر عبد الفتاح يقول...

إيه الجمال ده

انت بتكتب رباعيات كويس أوي على فكرة
تسلم إيديك

سندباد يقول...

د/ياسر
منورني يادكتور دايما متشكر اوي لذوقك وتعليقك ربنا يكرمك
شرفتني
ونورتني
تحياتي

فــرآشـة زرقــآ يقول...

السلام عليكم .

روعة جد سندباد ،
الرباعيات كلها جميلة .
يسلم فكرك وقلمك .

تحيتي لإبـداعك .

تقبل مروري
فـرآشة زرقـآ .

سندباد يقول...

فراشة زرقا
تحياتي لمرورك الدائم وتعليقك الجميل دائما
ربنا دايما يجعلني واكون عند حسن ظنكم
تحياتي يافراشة

Tears يقول...

جميلة رباعياتك و موهبتك واضحة


تحياتي

سندباد يقول...

Tears
متشكر لمرورك وتعليقك الرقيق
تحياتي الخالصة
نورتيني

هديل الحمام يقول...

بحط أيدي في جيوب الدنيا أسرق فرحتي
أجري من الناس وأقعد أسمع ضحكتي
ساعات تعلي وتعلي وتبقي غنا
وكتير تتخنق وتموت علي شفتي

عجبي !!

ما شاء الله ,,
ما يخرج من القلب يصل للقلب مبآشرةً
رباعيات جميله ومعبره ~
سلمت أناملكـ
,,
و ربي يرحم صلآح جآهين بوآسع رحمته ^_^

سندباد يقول...

هديل الحمام
متشكر علي مرورك وذوقك وتعليقك الرقيق وربنا يقدرني واكون دايما عند حسن ظنكم جميعا
تحياتي الخالصة
نورتيني

baby moon يقول...

اول مره اشوف التجربه دى
كمان العنوان جميل جداههههههه
تسلم ايدك

سندباد يقول...

baby moon
متشكر لتعليقك وزيارتك ومتابعتك الدائمة
نورتيني ونورتي السفينة
تحياتي الخالصة

yasmeen يقول...

صحيت النهاردة لاقتني مش أنا
وكأن عمري بقي ألف سنة
العيب فيا ولا في دنيتي
ولا الحمل زاد عليا أنا
******************
ساعات كده وقت الحزن تلاقي البكي بيريح
وساعات يزود جرحك يقعد علي قلبك ويريح
يألمك ويسهرك في ليلك تقعد تكلم نفسك
متلقيش إلا الفضفضة هي اللي تهديك وتريح
********************
جوايا كلام كتير ويجي ميت سؤال
ليه الحزن جوايا عامل زي الجبال
ليه جروحي سكناني ليل نهار
كل ما أدواي جرح يتولد غيره في الحال


رااااااائع بجد
جميله اوى الرباعيات دى

دمت مبدع