السبت، 16 يوليو 2011

من يوميات بشر - حوار الخبراء فـي قهـوة ابو حفيظة

تفتكر الريس هايرشح نفسه في انتخابات الرياسة تاني.

والله الواحد مش عارف يصدق مين جرايد المعارضة ولا بيانات الحكومة ولا شعبان عبد الرحيم.

تخيل مصر من وقت ما انتهي العصر الفرعوني لحد ثورة 23 يوليو محكمهاش حاكم مصري.

بفكر جديا اغير طقم الانتريه اللي عندي واجيب طقم صيني بيقولوا عليه كويس اوي.


انا قلتله لو مجبليش تلاجة 3 باب و20 قدم هأجل الجوزاة.


انا من راي طالما العرب بيكرهونا اوي كده نتنازل عن عروبتنا ونسمي البلد جمهورية مصر الفرعونية.


شبابيك شبابيك الدنيا كلها شبابيك.


انا قلتله امبارح لو كان نقل سيد معوض ناحية الشمال ولعب بابو تريكه تحتيه كان كسب الماتش.


زمان كنا بنقول يارب الستر والصحة دلوقتي بنقول الستر والصحة والصبر.

ياعم طول ما حسام حسن بيدرب الزمالك عمره ما هايخد بطولة.


بيقولوا الشاي بعد الاكل بيكسر الحديد ربنا يكون في عون الشعب شوية يغلو الحديد وشوية يكسروه.

منتخب مصر هايفوز النهاردة 2 صفر واللي هايحط الجون عصام الحضري.  

انا بقالي يومين عامل دماغ عشان مفهمش حاجة من اللي بيحصل بس للاسف فهمت مفيش فايدة.

الف سلامة عليك معلش خدلك حبيتين انتيبيوتك وانت تبقي زي الفل.

انا من رأي عشان نريح نفسنا نعمل الثانوية العامة بعد الجامعة علي طول.

نغير الدستور ولا نغير النظام ولا نتغير احنا.

انا بحاول اقيم الموقف عشان اقدر اضع النقاط فوق الحروف.

هو في ايه ؟
 بس يامجانين يا ولاد المجنونة.
ملحوظة: لو اشتغلنا قد ما بنتكلم كنا بقينا حاجة تانية خالص.
اسف علي التهييس اللي في البوست لكن قليل من التهييس لا يضر.

هناك 18 تعليقًا:

Carmen يقول...

هههههههههههه جميلة وواقعية والله

تسلم ايدك

غير معرف يقول...

مساء الغاردينيا سندباد
ههههههههههههه
بجد أختصرتها لو بنشتغل قد مابنتكل كنا عملنا حاجة بس عارف احنا فالحين في الكلام بس :) "
؛؛
؛
لروحك عبق الغاردينيا
reemaas

كريمة سندي يقول...

جات علينا .. والله التهيس جميل فالبلد كلها شوربة والمجلس العسكري مش عارف يعاقب مين ولا مين!!!

مصطفى سيف الدين يقول...

يا عم ايه الصداع ده كله والحكاوي دي كلها :)
اطفي التلفزيون وروح نام :)
فعلا القنوات الفضائية والقهاوي بوظوا مخ العيال
قليل من التهييس يظهر للعين الحقيقة المرة
تحياتي

Hadeir يقول...

احلى حاجه ف الشعب المصرى
ان كل واحد فاهم كل حاجه ف غـيـر مجاله
يجى بقى لمجال عملو او اللى حاجه اللى المفروض يفهمها تلاقيه يقلب هندى
هههههههههههههههههههههههههههه
بجد البوست بيوصف حالنا كويس اوى
شعب بتاع كلام

تحياتى

Unknown يقول...

خذ راحتك .....
على مايبدو أننا أصبحنا جميعاً فى حالة من التهييس

Bent Men ElZman Da !! يقول...

اهو احنا كده كل واحد فى ناحيه :D
جميله اوى
تسلم ايدك

rack-yourminds يقول...

هو فعلا محدش بوظ الزمالك غير حسام حسن

بس معلهش يا صاحبي جالكم حسن شحاته استعدوا بقي ههههههه

Unknown يقول...

هي دي مدونة فكرة و لا أنا دخلت في عنوان غلط :)
حلو تغير نمط الكتابه و للأسف الناس كلها بتتكلم و عاملين دوشه جامده...بس أنا بحب كتاباتك الرومانسيه أكتر.

اوعى تكون زملكاوي:)

تحياتي ليك

سندباد يقول...

كارمن
متشكر ليكي ياكارمن احيانا بيكون الواقع شئ ساخر جدا
تحياتي لمرورك الدائم

سندباد يقول...

ريماس
وده اللي مخلينا دايما بعيد عن النجاح
ربنا يدينا القدرة علي العمل قد الكلام
تقديري واحترامي
نورتيني

سندباد يقول...

كريمة سندي
ادعو الله ان يكون القادم افضل المهم اننا نتغير للافضل
تقديري واحترامي

سندباد يقول...

هدير
بالظبط كده وده اللي انا قصدته اننا كلنا بنتكلم في اي حاجة وفي كل حاجة ولما نتكلم في تخصصنا نبقي ولا حاجة
تحياتي وتقديري
نورتيني

سندباد يقول...

استاذ / محمد
ربنا سبحانه وتعالي يجعل القادم افضل واهدأ
تحياتي لمرورك الرائع
نورتني

سندباد يقول...

بنت من الزمان ده
زي ما كل حاجة اتغيرت في البلد احنا كمان لازم نتغير عشان نبقي احسن
تحياتي لمرورك
نورتيني

سندباد يقول...

مصطفي سيف
ههههههههههههههههه
صداع والله يامصطفي والواحد مش عارف يعمل ايه
ربنا يعديها علي خير
نورتني ياصاحبي
تحياتي الخالصة

سندباد يقول...

صديقي راك
اهم شئ انه جه راجل محترم ياصديقي عشان نترحم من الهمجية اللي كانت
تحياتي وتقديري

سندباد يقول...

شرين سامي
قليل من التهييس لا يضر وقليل من التغيير لا يؤذي
وادعو الله ان يكون القادم افضل لينا ولمصر
ومتشكر علي مجاملتك الرقيقة
نورتيني
ملحوظة: انا اهلاوي ابا عن جد