السبت، 19 مايو، 2007

كما انتي

استيقظ علي صوت الهاتف المستمر وقد حطم جدران الصمت المحيط ، حاول ان يهرب و يبتعد ولكن ظل الهاتف يدق بالحاح نظر الي شاشة الهاتف وتذكر الرقم تناول السماعة بحذر وجاء صوتها عذبا كما كان دائما " - صحيتك ولم تنتظر الرد – انا اسفة تحب اتصل في وقت تاني ولا ممكن نتكلم شوية " كما هي لم تتغير مازالت تثق في صوتها جيدا مازالت تعتقد انها لا يرفض لها طلب اقصد امر وان كان بصيغة الطلب لم ينطق وكأن صمته اعطاها اعتراف ضمني برغبته في الكلام ولم تترك الفرصة تفوتها وكان هو يذوب في صوتها وضغطت علي حروف كلماتها وقالت " وحشتني " تخيل انك جيت علي بالي امبارح هاتصدقني لما اقلك اني حلمت بيك مش مصدقني انت قلبك اسود انت لسه زعلان انا مبعدتش عنك ! انا كنت باخد فرصة افكر انا وحشة بس وقتها كانت في غشاوة علي عنيا ما كنتش شايفاك صح ، محدش قدر يفهمني غيرك رغم اننا كنا مختلفين في حاجات كتير بس انا بحبك ، انت اللي علمتني يعني ايه حب انا كبرت علي ايدك ، انت عايزني اعتذرلك لو عايز انا ممكن اعتذر بس انا مش عاوزة نرجع لبعض باعتذار ولوم كفاية اني بتصل بيك تحب تشوفني امتي " وبعد فترة صمت قرر ان ينهي هذا الهراء اغلق الهاتف وعاد الي نومه

هناك 46 تعليقًا:

amira يقول...

ليه ؟؟؟
ليه قفل السكة
والباب
وطريق الرجوع

ليه ؟؟؟

ادم المصري يقول...

ههههههههههههه
.
.
.
تصور كنت هتفاجئ جدا .. لو كان رد عليها واداها ميعاد للمقابلة
.
.
.
تحياتي ادم المصري
اول دكتور احه
مدون غير منحاز

truelove يقول...

تعرف يا سندباد مهما كان غلطها ومهما كانت اللي عملته يكفي له انها بتحاول اعادة ما كسرته وعندما تحاول المرأة فهي تعلم انها ترغب في هذا بشدة تحياتي لك

أيامنا الحلوة يقول...

مش هقولك ليه اغلق التليفون وانهى المكالمة دون مناقشة منه .. أكيد هي جرحتوا جامد اوي .. وعشان وصف مكالمتها بالهراء .. ولكن المرة اللي جاية لما تكلموا ..وده هيحصل ان شاء الله طالما هي حاولت الاعتذار كده وندمانة .. يحاول يسمعها كويس اوي ويعاتب ويطلع اللي جواه وبعدين يصفي قلبو ويسامح .. الست لما بتعتذر كده وبتندم صدقني بيبقى من جواها اوي

تحياتي

sendbad يقول...

اميرة
الظاهر ان الناس فهمت البوست ده انه حصل بجد لاء ياجماعة دي خيالات مدون اه صحيح انا بتمني حاجة زي دي تحصل بس بصراحة ياميرة معرفش هايكون رد فعلي ايه وقتها النظرية غير التطبيق شكرا علي زيارتك

ادم
ازيك يابا زيارتك شرفتني شكرا

قلوب حائرة
انا معاكي وانا دايما بقول ان الحب تسامح بس المشاعر لما تبقي لعبة بيهون الحب انما والله ده خيال مدون مش اكتر
تحياتي

ايامنا الحلوة
فعلا هي اكيد جرحته جامد بس لو خدتي بالك هو لسه بيحبها بدليل انه سمعها لاخر انما المشاعر احيانا بيصعب عليها
اوي من القسوة
بس والله ده ماحصل دي خيالات

لو كنت أعلم يقول...

عزيزي السيد المحترم سندباد
من فضلك ممكن أسأل سؤال؟
هو الرخم ده قفل السكة في وشها ليييييييييييه؟؟؟؟

يعني الحق عليها إنها كلمته
تأكد إن لما بنت بتقرر إنها تدوس على كرامتها وهي اللي ترجع بيكون القرار ده صعب جداً جداً جداً
لإن المرأة بطبيعتها بتحب إن الراجل هو اللي يجري وراها
_معلهش قدر الرجال في هذا العالم_
كما أن الرجل بطبيعته بيحب يكون الصياد اللي بيجري ورا الفريسة_ اللي هي الست_ قدر المرأة أيضاً_فلما الأدوار تتعكس فلازم كل طرف يقدر التضحية دي

على فكرة أنا غير منحازة والله للستات ولا للرجالة بس الموضوع كان محتاج شوية توضيح

البوست يجنن
رغم كل الكلام الأهبل اللي أنا قلته من شوية
أتمنى نكون أصدقاء وأشوفك دايماً على مدونتي
تحياتي

sendbad يقول...

عزيزتي لو كنت اعلم
اولا زيارتك للفكرة المتواضعة اسعدني جدا ثانيا الرخم اللي قفل السكة في وشها اكيد انجرح اوي والجرح لما يبقي من اقرب الناس ليك بيبقي قاسي اوي علي العموم احتمال لما تتصل تاني يقلها وانتي كمان وحشتيني ويمكن ما تتصلش تاني ويمكن يجيب بوكيه ورد ويروحلها ويقلها تعالي منفكرش في امبارح وتعالي نفكر في بكرة
مع الوضع في الاعتبار ان دي خيالات مدون رومانسي اوي شرفتيني
تحياتي

LAMIA MAHMOUD يقول...

لماذا لك يتمهل قليلا
ربما كانت تعني ما تقول

LAMIA MAHMOUD يقول...

نسيت اقولك ان القصة في حد ذاتها عبقرية .. بس النهاية مؤلمة بالنسبة لاي بنت حتقراها


المرة الجاية خلهياهي اللي تسيبه:P

Lemonada يقول...

يا عم والله انك جامد

احسن حاجة النوم
والانسان الي داس على قلبك حيدوس علي مرة ثانية
لازم يقدر الي عندو
مش يشوف الموجود في السوق ويرجع زي ما هو عايز

هي فاكراك بضاعة في السوق تشتري الي هي عايزا في اي وقت
بالتوفيق

sendbad يقول...

لميا
ازيك ده اولا ثانيا فكرتي منورة بيكي والله ثالثا انا مبسوط ان القصة عجبتك وعندك حق النهاية مؤلمة لاي بنت بس تفتكري ان المشاعر الصادقة تستاهل التسويف والمماطلة وعلي العموم المرة الجاية هاخليهم يرجعوا لبعض مش هي اللي تسيبه ايه رايك ، مع الوضع في الاعتبار الحالة النفسية اللي هاكون فيها وانا بكتب البوست
شرفتيني

sendbad يقول...

ليموندا
انتي الوحيدة اللي فهمتي قصدي من البوست مع الوضع في الاعتبار اني من اشد المؤيدين للتسامح بين العشاق بس في حدود فاصلة وخطوط حمرا لا يمكن تجاوزها احتمال فعلا تكون صادقة في كلامها وانها حست بغلطها واحتمال يكون هو قاسي في رد فعله بس كان لازم تحس ان المشاعر الصادقة مينفعش معاها التسويف والمماطلة
مع ملاحظة انها خيالات مدون مش اكتر تحياتي

نقطة مية يقول...

البوست قوي عشان واقعي جدا...هو انت عملت كدة فعلا و لا ده خيالك

تحياتي

sendbad يقول...

نقطة مية
ده خيال او تقدري تقولي رغبة في انه يحصل

gohayna يقول...

بص بقي علشان هنتخانق

انا قريت البوست اول ما نزلته بس مرضدش اعلق

كنت عايزه وقت علشان افكر


قدامك تفسير من الاتنين

اما انه مكنش بيحبها اساسا او كان بس مش الحب المفترض انه يكون
ولقي في قطع خطوط الرجعه نوع من الانتقام لكرامته الجريحه

واسمحلي اقولك انه عمره ابدا ما حب في حياته

هتقولي ظالمه ما هي اكيد جرحته

هقولك اسأل نفسك

الي بيحب حب ويكون غرقاتن فيه بكل كيانه وينجرح

صدقني مع اول باب للرجعه بيدي لنفسه فرصه

مش هقولك يلغي كرامته بس علي الاقل هيفكر

دا اذاكان بيحب بجد

عمر الحب ما يكون بعيد عن التسامح

عرف لما تكون بتحب اوي

ويحصل شيء
وتبعد بينكم الايام
وبعدين تصادف يوم وتلاقيه

عرف هتكون عامل ازاي

تخيل كدا هتحس بايه
تقريبا مش هتعرف تفكر وابدا عمرك ما هتفكر تخلص ابدا اللحظه دي
عمر صباعك ما هيطاوعك علشان تقفل السكه

احنا اقوياء علي الورق وبس صدقني

ربنا يديلك كل الي بتتمناه ويهدي بالك وتعيش سعيد مع الي بيتمناه قلبك

منتهي السعاده لما تكون جنب الانسان الي بتحبه بجد

ربنا يهنيك يارب

تحياتي ليك

sendbad يقول...

حهينة
هجوم بري وبحري وجوي ماشي ياستي بس انا مبعرفش اتخانق
اولا دي خيالات مدون ولو كنتي قريتي تعليقي علي تعليق اميرة كنتي فهمتي انا قصدي ايه انا قصدي عمر المشاعر الصادقة ما تبقي وسيلة للمساومة والمماطلة والتسويف وان الحب تسامح ورغبة وعطاء وقلت انا معرفش لو حصل الموضوع ده معايا شخصيا هاعمل ايه لان النظرية شئ والتطبيق شئ تاني
علي العموم اهتمامك بالبوست اسعدني جدا وياريت تكوني فهمتيني ومستني ردك

semsem يقول...

انا رايه شيل فيشه التلفون قبل ما تنام

همسات يقول...

مش هقولك دى حقيقة ولا لاء
ساعات الحقيقة بتمتزج بالخيال
عشان تعيشنا فى حاجة نفسنا تتحقق
:)
......................
وكل اللى اقدر اقولهولك اني مش مع ان الانسان يغلط براحته يجرح براحته واحنا نسامح بكل بساطة
مع انى عارفة كلنا بنى ادمين وبنغلط
بس لازم نتحمل جزء من غلطنا ده
لأن لو كل واحد غلط براحته واحنا سامحنا بكا بساااااااااااطة
مفيش حد هيحس انه غلط وهيكرر غلطه تانى وتانى
عارفة انى قاسية شوية فى كلامى بس الطبيعى ان كل اللى بيعمل حاجة اكيد ليها رد فعل سواء كويس او وحش
...........................
احيييك عالبوست ده

sendbad يقول...

سمسم
مفهمتش قصدك من التعليق علي العموم شرفتي فكرتي المتواضعة

sendbad يقول...

همسات
انتي مسالتيش حقيقة ولا خيال بس انا هاقولك انها خيال ومش هاكدب عليكي ، انا نفسي الخيال ده يحصل وابقي كداب جدا لو قلتلك اني وقتها هاعمل ايه لان النظرية غير التطبيق زي ما قلت قبل كده انما انتي كلامك مظبوط طول ما اللي قدامنا عارف انه مهما غلط هنسامحه عمره ما هيحس بقيمتنا احييكي
شكرا

Nada يقول...

اه....دي بس نظرية
انا كنت فاكرها قصة حقيقية
:)

لكنها واااردة....ممكن ما بين السطور عجبني...معناه انها المته جداا فيما قبل

تحياتي اليك

sendbad يقول...

ندي
شكرا لمرورك علي فكرتي المتواضعة و فهمتي قصدي بس علي فكرة ممكن يسامح النظرية غير التطبيق

رينـــــــــــا يقول...

ليه كدا :(
ليه مطلوب مننا نغفر ونسامح
وانتوا تأسوا وتهجروا
لى لو احنا غلطنا ميتغفرش لينا
وانتوا لو غلطوا مطلوب مننا نسامح

ليه لما نرجع انتوا تبعدوا
واحنا لما نبعد تبقوا هتموتوا وترجعوا

ليه احنا بنحب من قلوبنا
وانتوا تحبوا بعقلكم

لو دا مجرد خيال
يبقى مش غريب انك تتخيل كدا
لانك رجل فى الاول والاخر
كنت هستغرب لو حصل العكس

sendbad يقول...

رينا
هجوم شديد لسه برضه زي ما احنا مش قادرين نبطل انحياز انا مقصدش من البوست راجل وست انا قصدت مشاعر اتهانت واتسوف بيها سواء كانت الاهانة من الراجل او الست هي جت كده معايا ان الست هي اللي عايزة ترجع بدون قصد انها هي ست وهو راجل انا كنت بتكلم عن المشاعر في حد ذاتها ولو انتي متابعة بوستاتي من اول ما بدات انا كل كلامي علي الاحساس والمشاعر وبعدين انتي لو قريتي اول تعليق ليا علي البوست ده وباقي التعليقات اني لو حصل معايا الموقف ده مش عارف هاعمل ايه علي العموم شكرا للمتابعة ومنتظر الرد

الدمعه يقول...

ليه بس حرام كدة ميسامح هي يعني كان ايه الي حصل ؟؟؟؟؟؟؟؟ دة فعلا قلبه اسود
بس بجد انا اتفجأت في الاخر انه يقفل
والله حرام
صعبت عليا
بس بجد بوست جميل جدااااااااااااا مش عارفه اقولك ايه
ومرسي على مرورك في مدونتي
تحياتي

Sharm يقول...

و رجع يينام كأن مفيش حاجة حصلت

!!!

sendbad يقول...

الدمعة
شرفتيني ونورتي فكرتي اولا لازم تعرفي انها خيالات مدون وبعدين مش يمكن لو عرفتي تبريره يصعب عليكي هو كمان علي العموم انا قلت في التعليقات اللي قبل كده انا لو في مكانه مش هاعرف اعمل ايه
تحياتي

sendbad يقول...

شارم
نورتني ,رجع ينام طب انت لو مكانه كنت هاتعمل ايه مع الوضع في الاعتبار ان البوست ده خيال مدون مش اكتر اصلي الهجوم كتر عليا من يوم ما نزلت البوست ده

حقى اهرتل يقول...

انا كنت من غير الصحاب صاحب قلق
وكنت عايش ف الحياه ع المفترق
مين اللى قال انك هتقدر تنتفض
من غير ما حد يشد ايدك م الغرق

sendbad يقول...

حقي اهرتل
شرفتني ونورتني ياريت دايما شكرا

الحلم العربي يقول...

رغم ان النهاية مؤلمة
إلا ان البوست رائع
هي مؤلمه له لانه هيصحى من النوم يعرف ان ده كان حلم مش حقيقة بعد ما شعر و لو شعور بسيط بإن كرامته رجعتله برجوعها للحق .....
اتمنى ده يحصل في الحقيقة ...اننا ما نخافش نقول اللى نفسنا يحصل و ما يمنعناش كبرنا من الاعتراف بالحق..
تحياتى للمدونة الرقيقة

shahy يقول...

كل اللي اقدر اقولة
اني كنت مستمتعة جدا جدا بقراءة الكلام الجميل دة
ممكن اسألك سؤال رخم شوية؟
اية اسباب الطلاق؟
طبعا لو مش عاوز تقول حاجة براحتك
بس اصل انت رومانسي اوي
والفضول هايموتني ومش قادرة اتخيل اسباب
ارجو الافادة لو مافيهاش احراج يعني
السلام عليكم

shahy يقول...

خلاص انا عرفت الرد من بوست الانفصال
اسمح لي اقول رأيي
انشغالك بالعمل دة مش سبب لطلب الطلاق وبعدين انت كنت بتحاول تضمن لها اولا ولأولادك ثانيا مستوى مقبول للمعيشة وكويس انك حسيت انك كنت مقصر معها وكان لازم تديلك فرصة تانية
حاول معها تاني وربنا يهديها
ان شاء الله

sendbad يقول...

الحلم العربي
كلامك حقيقي والاعتراف بالخطا مش هايعيب المعترف بالعكس هايعليه وانا كان قصدي من البوست ده حاجتين مهمين جدا اولا ان المشاعر الصادقة مينفعش تتسوف وتبقي مجال للهو والكبر ثانيا اذا كان التسامح شئ مهم جدا وضروري بين العاشقين انما في حاجات لا يمكن ان تغتفر خاصة الاستهزاء بالمشاعر, مساءلة انه يسامح او ميسمحش دي تتوقف علي درجة الحب ودرجة الجرح تحياتي وارجو التواصل

sendbad يقول...

شاهي
متشكر علي زيارتك لفكرتي المتواضعة واديكي عرفتي سبب الطلاق وبدون مبالغة او تجمل وزي ما انتي قلتي انا رومانسي جدا ويبدو ان رومانسيتي كانت هي السبب انا شخصيا معرفش اكره وصدقيني رغم الانفصال وتباعته واللي عملته مكرهتاش
تحياتي وشكرا لزيارتك

ساعه الغروب يقول...

على فكره كتير اوى الواحد بيتمنى مكالمه زى دى

بس لما بتيجى بتجرحه اوى

شكرا ليك على لحظه صادقه

بس احسن انه عمل كدا

عرف بيبقى صعب اوى انه حد اخد قرار بانهاء حب ما
ويرجع تانى حاجه تشده ليه

ما علينا

المهم انه شكرا ليك بجد

:)

sendbad يقول...

ساعة غروب
شكرا لزيارتك فعلا عندك حق صعب ان المشاعر تبقي لعبة في ايد الناس خاصة لما تكون مشاعر صادقة ونبيلة علي العموم شكرا للتواصل وارجو الاستمرار

Casper يقول...

والله العظيم تلاتة جدع انه قفل السكة

Diyaa' يقول...

أحياناً بتفوت فرصة التراجع ..وفرصة الاستعادة
عجبني العنوان ...
وبالنسبة لأميرة ..لو هتقري تعليقي
مش دايماً التسامح بيكون سهل ..في ناس التسامح نفسه بيمل منهم

gohayna يقول...

ياسيدي الكريم

انا فهمتك من اول تعليق عندك

وكنت عارفه وانا بكتب تعليقي انها خيلات مدون

وحبيت الفت نظرك انها لو بقيت حقيقه هيكون التصرف حاجه تانيه خالص

فهمتك صدقني

عارفه ان المشاعر الصادقه مش محتاجه مماطله

بس برضه لو حسيت بالصدق في عيون الطرف الاخر يبقي اكيد هتتبع سياسه الفرصه التانيه

عموما ربنا يهنيك يا سيدي وتلاقي اجمل مشاعر تهني قلبك وتكون سعيد علي الدوام

تجياتي ليك جدا

sendbad يقول...

كاسبر
صديقي واخويا وحبيبي دايما رافع من روحي المعنوية ربنا يخلينا لبعض

ضياء
فعلا كلامك منطقي للغاية شكرا يا عزيزي علي التواصل

جهينة
اهتمامك بيسعدني ويديني احساس ان الدنيا لسه بخير واسعدني اكتر انك فهماني ربنا يبارك فيكي
تحياتي

نفسنا يقول...

تم أفتتاح العدد الأول من مجلة نفسنا
نتمنى منكم زيارتنا

Radwa يقول...

كان لازم يسمعها واذا كان عندها اعذار مقبوله فيعاتبها ويعرف هى عملت ليه كدة ومش عيب ان الانسان يغلط العيب انه يكرر الغلط ولو

sendbad يقول...

رضوي
فعلا كان لازم يسمع بس ده لو عارف ان غلطها يغتفر اصلي في اخطاء لا يمكن تتنسي خاصة لما يبقي الغلط في المشاعر الصادقة شكرا لمرورك وتحياتي وارجو الاستمرار

واحدة من الناس يقول...

لما بدأت أقرأ مع كل كلمه قالتها وأنا برد أقول لاء لأنى كرهتها وكرهت ثقتها الزايده وايمانها ان طلباتها لا ترد ولما قفل السكه فرحت أوى لأن الحب مش تجربه ولا شنطه عايزه تشتريها فتلف فى السوق تشوف أنسب حاجه
بس لما قريت بعض ردك على التعليقات بكيت
بجد ألمتنى أوى لما قلت انك بتتمنى ان ده يحصل ومش عارف رد الفعل هايكون ايه
ووجعتنى أوى لما قلت انه ممكن يكون قفل السكه وراح جابلها بوكيه ورد ويصالحها

سامحنى لو مش بتمنى ان ده يحصل رغم كل كلمات التسامح أنا بتمنى ان ربنا يعوض عليه ويرزقه بلى تقدر حبه ومشاعره
ليه المشاعر الصادقه مصرها الهجر بتفضل تنزف وطبيبها سايبها ولما نبتدى نداويها يظهر عشان يفتح الجرح من جديد
الحب لؤلؤه لو الى رماها بكل قسوه وكسرها قدر يلم الفتات ويرصه من جديد ويرجعه ذى ما كان من غير ولا شرخ يبقى ساعتها يطالب بالرجوع
مش هانسى أحييك على اختيار العنوان وأسفه على الإطاله

sendbad يقول...

واحدة من الناس
ده اكتر تعليق اثر فيا هي دي الحيرة اللي انا فيها ايماني بان الحب والمشاعر الصادقة لا يمكن تكون تسلية اوتجربة وايماني بان التسامح شئ جميل ، حيرة وقلق رغبة وشوق وجرح وكرامة حاجة تحير وتلخبط
تعبيراتك في وصف الحب جميل جدا وتعليقك اكثر من رائع انا بعتبره بوست لوحده
ربنا يسمع منك ويريح باله وقلبه ويعوضه ويخلينا نحس كلنا ونعرف قيمة المشاعر الصادقة
تحياتي ليكي جدا جدا جدا
شكرا