الجمعة، 25 مايو 2007

الان اصبح عندنا مدونة


ايها الامراء والملوك والرؤساء من المحيط للخليج ايها المتاجرون باعراضكم وشعوبكم من اجل الكراسي احذروا فالان اصبح عندي مدونة
ايها الفاسدون والمرتشون ببر مصر المحروسة افعلوا ما تريدون ولا تستحوا ولكن احذروا فالان اصبح عندي مدونة
ايها الطامعون والكاذبون ايها الظالمون الجامعون للاموال علي اشلاء الكادحين احذروا فالان اصبح عندي مدونة
ايها الشعب لا تقلق ان غدا لناظره قريب وقد اصبح عندنا الان مدونة

هناك 33 تعليقًا:

gohayna يقول...

انا معاك ان الرئي والتعبير ليه قوه وسحر خاص

بس تفتكر هينفع مع العالم دي؟

تفتكر المدونه والكلام الي فيها

هيغير حاجه

انا مش قصدي احبطك

بس والله بسأل بجد؟

هينفع معاهم الكلام دا؟


فين الخمسه جنيه علشان علقت اول واحده؟
ادخل الاقيها لو سمحت لحسن مش هيحصل طيب ابدا

تحياتي

shahy يقول...

اخيرا كتبت حاجة
انا فعلا باستنى كتاباتك وبادخل على مدونتك انت وطهقان وطهقانة وبرايد وجبهة التهيس مرتين في اليوم بجد مش مجاملة
وربنا يديلك راحة البال ويبعد عنك الحزن مع انة بيخلي كلامك يلمس القلب على طول
سلام يا سندباد

مريم يقول...

كنت خليتها اصبح عندى بندقية
كده تجيب نتيجة
ما انا بقالى سنة ومحدش عبرنى اهو

سندباد يقول...

جهينة
سؤالك جميل وكنت متوقعه ومجهز ردي وانا بنزل البوست كلامي يمكن مش هينفع معاهم انما هاينفع معانا عارفة اجمل حاجة في عالم التدوين ايه ان فكرتي عن الجيل القادم اتغيرت انا كنت فاكر ان كل اللي بيدخل النت علشان يعمل شات ويسلي وقته وخلاص دلقوتي لقيت جيل قادم فاهم ومثقف وواعي وعايز يغير تخيلي لو كل سنة زاد عدد المدونين عشرين ولا اربعين فتاة وشاب من النوعية اللي نفسنا فيها وكل واحد من دول مسك منصب او اصبح قائد او مدير او حتي وزير مش هايبقي عندنا نوعية نفتخر بيها ونثق فيها دي وجهه نظري
تحياتي ليكي جدا جدا وهابعتلك الخمسة جنيه بس اديني العنوان

سندباد يقول...

شاهي
شهادة اعتز بيها وبتديني ثقة في نفسي وان شاء الله دايما اكون عند حسن ظنكم اما عن حزني فسبحان الله يمكن ربنا شايل ليا فرح كبير ومديني الحزن علشان اعرف قيمة الفرح اللي جاي ادعي معايا ان ربنا يديني الصبر
تحياتي

سندباد يقول...

مريم
احيانا بيكون الكلام اقوي من اي مدافع وياريت تقراي تعليقي علي تعليق جهينة وانتي تفهمي وجهة نظري تحياتي لكي جدا جدا شكرا

Ehab يقول...

اه وخلى المدونة صاحية صاحية صاحية والكيبورد فى ايديا نهار وليل صاحى
كان فى اغنية لايمان البحر الدرويش زمان كان اسمها قول يا قلم قول اكيد انت فاكرها يا باشا
التدوينة دى فكرتنى بالاغنية وخصوصا لما كان بيقول اجعل كلامى قنابل تصبح حصاد الجبارين
ياريت يكون كلامنا قنابل فعلا ولو مكانش كفاية انه بيدينا بعض الراحة النفسية

سندباد يقول...

كاسبر
فعلا هو بيدينا الراحة النفسية وفاكر طبعا اغنية ايمان البحر وياما شغلناها بصوت عالي يمكن يسمعوا
شكرا وتحياتي

shermen يقول...

أنت بتهددهم بمدونتك
يارب تجيب نتيجه حلوه
هو احنا نكرهه
طيب أشهرها في وشهم كده
واحنا وراك
ماتخافش
وراك رجاله


مش رجاله أوي يعني
بس ممكن نسد
هو في أجدع من الستات

مش قصدي أنتوا ليه بتفهموني غلط
طبعا انتوا أجدع

المهم
أبدأ
شكلي بهيس

سلام
قبل ما اهيس تاني

سندباد يقول...

شيرمين
هيسي براحتك وانا متاكد ان ورايا رجالة وستات جدعان بس ايه رايك شكلي حلو وانا بهدد
تحياتي

الحلم العربي يقول...

أعتقد ده هو السبب اللى بيخلى كتير من المدونين يدونوا ...حرية التدوين
مهما كان في ظلم و قمع ..ما بقاش ينفع تتكبت حرياتنا بعد كده ...شكرا للتكنولوجيا التى منحت للكل حريات لم نكن نعرفها من قبل...
فكرة جميلة جدا
تحياتى

غير معرف يقول...

وبعدين بقى معاك ياسندباد انت عايزهم يقفلولنا المدونة او يأجروهالنا ولا ايه خليها في سرك بقى.. ولا اقولك وداعا للخوف واهلا بيكي ياحرية اكتب براحتك واصرخ بصوت عالي انا صاحب مدونننننننننننننننننننة

تحياتي

semsem يقول...

مبروك المدونه الحربيه دى يا باشا

اتكلم براحتك
واسعدنى جدا مشاركتك عندى
تحياتى

سندباد يقول...

الحلم العربي
فعلا شكرا لكل حاجة بتخلينا نعبر عن نفسنا ونتكلم ونفضفض وكل حاجة بتخلينا نخاف علي بلدنا وعلي حريتنا
تحياتي

سندباد يقول...

ايامنا الحلوة
تجي اصرخ وانتي تصرخي ونشوف مين يصرخ اكتر من التاني ونقول تحيا الحرية

سندباد يقول...

سمسم
انا اللي اسعدني زيارتك جدا وانشاء الله دايما والمدونة الحربية تحت امرك
تحياتي

Eman Eltaher يقول...

يااااااااه لو كان كل واحد يقدر يغير الكون بكلامه ف أى مكان

ف جرنان ف مجلة ف مدونة ف أى شئ

مقصدش طبعاانى أحبطك بس انا نفسى محبطة

يعنى انا واحدة م الناس اللى نفسها صوتها يوصل لكل مكان

و يقروا مواضيعى اللى بتهمنى جدا

شباب ال 30 حيلة عشان يحترم نفسه كل شاب يحاول يتسلى بمشاعر بنت

و هكذا ف كل مواضيعى اللى كتبتها و عايزة أكتبها

ياللا ربنا يوفقنا

تحياتى ليك

sakayar يقول...

وانا اللي فاكرك فاكرك ... أتاريك أتاريك

سندباد يقول...

ايمان
دمك الخفيف سابقك في كل مكان بتروحيه شدي حيلك واكتبي وقولي لحد ما الناس ما تسمع وحتي لو مسمعتش المهم انك اتكلمتي ومحدش قدر يسكتك وتحيا الحرية

روميو
اسف مفهمتش تعليقك انما شرفتني

truelove يقول...

عزيزي سندباد المدونة ان كانت له هدف فهي هدف شخصي الا وهو تفريغ ما يدور بالنفس البشرية ومشاركة الاخرين فيها الامر الذي يجعلك في حالة افضللا مما كنت عليه وليس انها وسيلة لاسماع طبقة معينة اصواتنا او ارائنا

سندباد يقول...

احتمال فعلا يكون معظم المدونين بيعبروا عن نفسهم وعن اراهم الشخصية انما ده ميمنعش اننا نحاول نوصل لكل الناس اعتراضنا واستيائنا عن اللي بيحصل
تحياتي

Lemonada يقول...

مفيش اكثر من كدة تعبير في كلمات قليلة زي كدة

عندي طلب بس ملهوش علاقة بالموضوع دى
انت دايما بتكتب بطريقة جميلة عن علاقة الرجل والمرءة عاوزاك تكتب عن الجواز التقليدي
واكيد انت عارف اي الاسئلة الي ممكن الواحد يسئلها للشريك لو كان اول مرة يتعرف علي عن طريق الجواز التقليدي خصوصا انو مش حيكون الوقت كفاية للمعرفة الصحيحة عن الشخص

ارجو مساعدة صديقتي في هذا الموضوع
تحياتي

نقطة مية يقول...

ايه الكلام الجامد ده..متقلقش هم عارفين ان عندنا مدونة ياريت بس نعرف نقدم حاجة او نوفق في عرض رسالتنا
تحياتي

ابو العربى يقول...

هنقول كلمه حق عند سلطان جائر
ومش هنخاف

تحياتى

سندباد يقول...

ليموندا
شاكرين اهتمامك ومرورك وطلبك علي العين والراس عنيا الاتنين انشاء الله هابدا في كتابة الموضوع ده بالطريقة اللي تفيدك بس ده مش هايكون البوست الجاي اللي كتبته فعلا خاصة وانه موضوع مهم وهايخد وقت انما هاوعدك اني هابدا فيه عي طول وشكرا لثقتك
تحياتي

سندباد يقول...

نقطة ميه
ده هدفي وهدف كل واحد عنده حاجة يقولها ان الناس تسمعه خاصة اذا كانت من نوعية الناس اللي عاملة ودن من طين وودن من عجين
تحياتي

سندباد يقول...

ضد الظلم
لازم منخفش ولازم نتكلم ولازم يسمعوا صوتنا لاننا خلاص بقينا علي الاخر
تحياتي لمرورك وارجو الاستمرار

gohayna يقول...

انا دخله امسي عليك

ازيك وايه الاخبار

وفين الجديد حضرتك

وقبل دا كله فين الخمسه جنيه

انا بعتلك العنوان

والنبي عيزاها بالدي اتش ال اسرع

انت عارف الظروف

تحياتي ليك وفي انتظار جديدك

رينـــــــــــا يقول...

الامل جميل
بس ياترى للدرجه دى احنا بقينا نتحامى فى مجرد الكلام والتعبير عن اللى جوانا :(
معنى كدا اننا هنفضل نتكلم وبس:(

ياريت الكلام يقدر يحمينا

سندباد يقول...

جهينة
مساكي وصل وبارك الله فيكي والجديد موجود شويتين كده وهاتلاقيه تحبي اخلي الخمسة جنيه عشرة علشان الظروف

سندباد يقول...

رينا
طريق الالف ميل يبدا بخطوة واحنا سكتنا كتير ادينا بنتكلم وانشاء الله الكلام هيتحول الي اعصار مش رط نعمله احنا المهم اننا بدان الطريق تحياتي

همسات دافئه يقول...

صبعا أحيانا الكلمه بتكون أقوى من البنادق والدبابات وبتغير مصائر شعوب هوه يعنى كان أونكل مصطفى كامل مسك حتى سكينه ده مكانش فيه نفس يشيل نفسه ومع ذلك عمل الى جيوش متقدرش تعمله
المشكله ان الكلمه ده تتحبس أو تخاف تخرج وتعتكف فى صمتها
تحياتى:))

سندباد يقول...

واحدة من الناس
عمي صلاح جاهين بيقول الكلمة ايد الكلمة رجل الكلمة باب
الكلمة كبري صلب فوق بحر العباب
ادينا بنحاول يمكن لما نبدا احنا بالكلام يجي اللي بعدنا ويطبق الكلام لفعل ليه لاء