الاثنين، 23 أبريل، 2007

ياسمرة


ياه يابلد قد ايه انتي صابرة
شايلة جواكي وساكته
ويلوموني لما اقول بحبك ياسمرة
عارفة
مبلقيش الا في حضنك دفا
حتي وانا تحت ايد جلاد جفا
طب وانتي ذنبك ايه
ده قلب الام كله وفا
اعمل ايه عشان اسعدك
اموت وبدمي علي ترابك اكتبك
اعيش وارفع راياتك
وبعلو حسي اندهك
متخافيش يابلد
لسه فيه الف ولد
نفسهم فيكي ونفسك
يبقوا عون وسند

هناك 9 تعليقات:

LAMIA MAHMOUD يقول...

انا كنت بسأل شعرك ولا لاء .. اللي بيتكتب في الكومنتات .. بس واضح من الاداء انه شعرك

رائع فعلا

yasmina يقول...

اولا عاوزه ااقولك شكرا على مرورك عندي
اول حاجه شدني موسيقى عمر خيرت التحفه
زي الهوا
فعلا البلد دي مستحمله كتير وشايفا كتير مننا
عمر مكان العيب فيها العيب مالي ناسها مش ماليها هيا
وهيا راضيه بحالها وبينا زي ما انت قلت زي قلب الام

متخافيش يابلد
لسه فيه الف ولد
نفسهم فيكي ونفسك
يبقوا عون وسند

فعلا مصر لسا فيها ناس بتحبها
احييك على البوست الجميل والمدونه الاحلى

ياسمين يقول...

انت شاعر ممتاز فعلا
وانا مبسوطة انك علقت عندى عشان اقرا شعرك الجميل
وجيت المدونة وعرفت من التاريخ انك من المدونين الجدد
فأهلا ومرحبا بك فى اسرة التدوين الجميلة
تحية كبيرة من واحدة بتعتبر نفسها من العائلة الكبيرة .. عائلة التدوين

ياسمين يقول...

أنا قرأت تعليقك عندى على بوست الطلاق الناجح
هل يمكنك أن تشارك فى الحملة تحت اسم الطلاق الناجح؟
محمد حمدى صاحب مدونة دماغى بيشارك فعلا وسمراء النيل وطارق واحد من الناس ومحمد حسام شارك شاركوا بتجاربهم
فهل أطمع أن تشارك بتجربتك؟؟
تأكد انك لو رفضت لن أتضايق ولن أعترض
مستنية ردك

sendbad يقول...

الي لمياء
انا اللي كاتب الاشعار في الكومنتات بتاعتك وشكرا علي ذوقك وشرفتي مدونتي ويارب اكون عند حسن ظنكم

sendbad يقول...

ياسمين
اولا :- متتخيليش قد ايه موضوع التدوين ده فرق معايا معنويا قد ايه ، لقيت نفسي من اول وجديد بعد ما كنت برجع من شغلي علشان انام وانام علشان اروح شغلي
ثانيا : مكنتش متخيل ردود الافعال الجميلة منكم وبالسرعة دي خاصة واني يادوب بقالي تقريبا اسبوع مش اكتر
ثالثا : انتي فعلا كبيرة العائلة الكبيرة لاني اتعلمت كتير من مدونتك ودي مش مجاملة
رابعا : يسعدني اشارك في اي حاجة تتكلموا فيها انا عندي لهفة ورغبة في الدخول لعالم التدوين بكل طاقتي وعندي افكار كتيرة اوي بس انتي قولي طبيعة المشاركة ازاي وانا تحت امركم

sendbad يقول...

Yasmina
متشكر جدا علي تعليقك الجميل علي كلامي ولازم اي واحد عايز يتعلم التدوين يمر علي مدونتك وفي انتظار تشجيعك دايما

Casper يقول...

حبيبى الباشا الكبير كلام كبير اوى وزى ماقلتلك قبل كدة فكرتنى بايام زمان ايام ما كان شعرك مالى كشاكيل شد حيلك بقى وخليه يملى المدونات انا فرحان جدا ان انت رجعت تانى

sendbad يقول...

وانا فرحان ياكاسبر برد فعل الجميع بصراحة انت عملت فيا جميل انك شجعتني علي مدونة الفكرة وربنا يسهل واكون عند حسن ظنكم