الجمعة، 27 أبريل، 2007

تخاريف


صياد ورامي شبكتي في البحر وكلي امل
لا عمري كليت ولا عمري حسيت بالملل
موجة ورا موجة تمرجح مركبي بدلع
وانا قاعد ناسي الدنيا والهموم والعلل
فرحان ؟ اه فرحان
يعني قال بالحزن الحال هايتعدل
بتحب ؟ اه بحب
وحبيبي شايلني في عينه زي الطبيخ في الحلل
تعبان ؟ تعبان
بس عمري ما قعدت اندب ولا جاني شلل
صابر ؟ ايوة صابر
وصبري يحسدني عليه الجمل
خايف ؟ لاء مش خايف
قلبي اسد وعقلي يصلح الخلل
عايز ايه ؟
عايز احس اني بني ادم
آكل لقمتي وانام
من غير حزن علي صدري زي الجبل

هناك 28 تعليقًا:

الوردة السوداء يقول...

حلوة وخفيفة

المدونة كلها لزيزة

واحدة من الناس يقول...

يابختك ياصياد
قاعد ناسي الدنيا والهموم والعلل
فرحان ؟ اه فرحان
يعني قال بالحزن الحال هايتعدل
رائعه فعلن :)
أول مره أفتح المدونه ده وصدقنى من المدونات النادره الى مقفلتهاش غير لما قرأتها كلها كل حاجه مست شىء جوايا اسمحلى أضفها عندى فهى تستحق:)

sendbad يقول...

الوردة السوداء
شكرا للمتابعة شكرا لذوقك واطرائك واتمني دايما اني اكون عند حسن ظنكم

sendbad يقول...

واحدة من الناس
بصراحة مش عارف اقول ايه شرف ليا انك تحطي فكرتي الصغيرة في بحر افكارك من حقك تضفيني من غير استئذان شكرا علي مرورك وارجو الاستمرار

~ Bato0ot ~ يقول...

gamila awy enta ely katbha????

sendbad يقول...

batooot
ايوة انا اللي كاتبها ايه رايك

reri يقول...

لذيذه أوي....وحلوه حبيبي شايلني في عنيه زي الطبيخ في الحلل... مش عارفه ضحكني أوي التشبيهه ده...ههههههههههههه... تحياتي ليك

sendbad يقول...

ريري
شكرا علي اهتمامك بالمتابعة وجميل اني عرفت اضحكك لان الضحك غالي اوي الايام دي

رينـــــــــــا يقول...

كلامك لمس قلبى وعقلى
واختيارك لعمر خيرت وجعنى اكتر
فعلا مدونتك جميله اوى اوى

sendbad يقول...

رينا
شكرا علي مجاملتك وذوقك ويارب دايما اقدر احوز اعجابك

amira يقول...

جيت أقول مساء الخير
وألقي السلام والتحية

بصراحة
لسه
لسه شوية عليّــا علشان أقدر أكتب تعليق على تدويناتك

بس عدد المتابعين لمدونتك زاد واحد

قصدي واحدة

سلام

sendbad يقول...

اميرة
مساء الخير
متشكر علي ذوقك المدونة بتزيد بيكم وباهتمامكم بس كان نفسي تعلقي

gohayna يقول...

انا اخدت جوله ىفي مدونتك الجميله

وبصراحه مش عارفه اقولك ايه؟

في مواضيع هزتني جامد جدا

اشدها الانفصال

انا قريته اكتر من تلات مرات
وبجد كل مره بقرأه بحاول اشوف مين الي غلطان

متزعلش مني انتم الاتنين غلطانين

والي بيدفع التمن هما الاولاد

انا مش جايه اقلب المواجع ولا حاجه

وبالنسبه لكلام ياسمين عن الطلاق مش كل الحالات بيكون الطلاق سيء

وعمر ما الطلاق كان المشكله

المشكله الحقيقيه
في الي بيحصل بعد الطلاق

وهو دا الي بيعقد الدنيا
وبيشكل نفسيه الاولاد

ولو فيه احترام بين الطرفين بعد الطلاق

صدقني مش هتكون مشكله

صحيح هيلزم وقت للتأقلم مع الوضع الجديد

لكن الامور اكيد هتتزن من جديد

حلقات الصمت برضه رائعه وفيها احساس اكتر من رائع بجد

كلامك بيلمس القلب مباشره

اسفه ان كنت طولت عليك
بس اكيد هكون زائره مستمره لمدونتك

لوتقبل

تحياتي

sendbad يقول...

جهينة
شكرا علي اهتمامك وكلامك منطقي الي حد ما لكن المشكلة في التاقلم مش اكتر يعني المفروض بعد 12 سنة يبقي صعب اوي التاقلم لكن قدر الله ما شاء فعل وطالما الاحترام موجود يبقي في امل واسعدني اعجابك بفكرتي الصغيرة وياريت فعلا تزوري افكاري باستمرار

حزيــــــــــــــــــن يقول...

شكرا على زيارة مدونتى انا كمان هضيفك

سهر الليالى يقول...

حلوه اوى وخفيفه انت شكلك شاعر كبير ومش عايز تقول عاملها مفاجاه صح
:)))
تحياتى

sendbad يقول...

سهرالليالي
شكرا علي ذوقك ومرورك علي فكرتي الصغيرة وياريت متكنش الاخيرة

Casper يقول...

باشا كالعادة كلامك فى الجون اسف على تاخيرى عليك بس انت عارف الظروف

sendbad يقول...

عزيزي كاسبر شكرا وربنا يكون في العون

~ Bato0ot ~ يقول...

gamila gedan bgd w feha shabah mn eslob salah jahin

sendbad يقول...

batooot
شكرا ياريت كل افكاري تعجبك

وليد يقول...

حلو الزجل

لكن الحقيقة إننا فى مصر فاضل لنا كتير عشان نكون زى ما تتمنى

yamen يقول...

ربنا ينولك اللي في بالك وتطلعلك السمكة اللي انت مستنيها

تحياتي

sendbad يقول...

يامن
يارب ياخويا يارب

sendbad يقول...

وليد
شكرا للزيارة انت فهمت انا قصدي ايه نورت الفكرة

Shiko يقول...

الله عليك
ابيات رقيقة وبسيطة عجبتنى جدا هو ده المصرى اللى شايل الهموم فى قلبه ورغم كده عايش الحياه بكل مافيها
قلت ارد الزيارة لقتنى فى مدونه جميله

على الطريق يقول...

جميل جدا كلامك يا صياد .. لكن الحياة بدون مشاكل وأحزان بالتأكيد ستكون مملة ولا طعم لها

carol 2002 يقول...

عجبتنى جدا
هذا لا يمنع إننى قرأت ما بعدها من بوستات .. تحياتى